நிரந்தர நியமனங்களை வழங்குவது தீர்வின் ஒரு பகுதி மட்டுமே என்று மலேசிய மருத்துவ சங்கம் கூறுகிறது.

MMA தலைவர் டாக்டர் சிவனேசன் லெட்சுமணன், பொது சேவையில் மருத்துவர்கள் நீண்டகாலமாகத் தொடர்ந்து பணியாற்றி, தங்களின் தொழில் வாழ்க்கையை நிலையாக உருவாக்குவதற்கு ஏதுவாக, பதவி உயர்வில் அதிக நியாயமான வாய்ப்புகள் வழங்கப்பட வேண்டும் என்றும், அவர்களின் அனுபவம் மற்றும் தகுதிகளுக்கு உரிய அங்கீகாரம் அளிக்கப்பட வேண்டும் என்றும் வலியுறுத்தினார்.

மலேசிய மருத்துவ சங்கம் (MMA), மருத்துவர்களின் ஊதியத்தை மறுபரிசீலனை செய்ய வேண்டும் என்ற தனது கோரிக்கையை மீண்டும் வலியுறுத்தியுள்ளது. 2024 முதல் 2026 வரை நிரந்தர மற்றும் ஒப்பந்த அடிப்படையில் பணியாற்றிய 3,510 மருத்துவ அதிகாரிகள் பதவி விலகியுள்ளதாக சுகாதார அமைச்சர் தெரிவித்ததைத் தொடர்ந்து இந்தக் கோரிக்கை முன்வைக்கப்பட்டுள்ளது.

பதவி விலகியவர்களில் 1,252 பேர் நிரந்தர மருத்துவர்கள் என MMA தலைவர் டாக்டர் சிவனேசன் லெட்சுமணன் தெரிவித்தார். இந்தப் பதவி விலகல்கள், “பணிப் பாதுகாப்பு மட்டுமே மருத்துவர்களை அரசுப் பணியில் தொடர்ந்து வைத்திருக்கப் போதுமானதல்ல,” என்ற தெளிவான செய்தியை உணர்த்துவதாக அவர் கூறினார்.

ஒப்பந்த மருத்துவர்களுக்கு நிரந்தரப் பணி நியமனம் வழங்குவது பாராட்டத்தக்க நடவடிக்கை என்றாலும், அது மட்டுமே பிரச்சினைக்குத் தீர்வாகாது என்று சிவனேசன் தெரிவித்தார்.

பணியை விட்டு வெளியேறியவர்களுக்குப் பதிலாகப் புதியவர்களை நியமிப்பது மட்டுமல்ல, மருத்துவர்கள் ஏன் வெளியேறுகிறார்கள் என்பதையும் நாம் கண்டறிந்து தீர்வு காண வேண்டும்.

“மருத்துவர்களின் பொறுப்புகள், வேலை நேரம் மற்றும் தொழில்முறைத் தேவைகளுக்கு நியாயமான வகையில் அமையும் வகையில் அவர்களின் சம்பளம், படிகள் மற்றும் இரவுநேர அவசரப் பணிக்கான கொடுப்பனவுகள் ஆகியவற்றை மறுபரிசீலனை செய்ய வேண்டும்,” என்று அவர் இன்று வெளியிட்ட அறிக்கையில் குறிப்பிட்டார்.

சிறந்த ஊதியத்தை வழங்குவதுடன், அரசுப் பணியில் மருத்துவர்கள் நீண்டகாலத் தொழில் வளர்ச்சியையும் திருப்திகரமான பணிவாழ்க்கையையும் உருவாக்கிக்கொள்ளும் வகையில், பதவி உயர்வுக்கான சமமான வாய்ப்புகள் வழங்கப்பட வேண்டும் என்றும், அவர்களின் அனுபவம் மற்றும் கல்வித் தகுதிகளுக்கு அதிக அங்கீகாரம் அளிக்கப்பட வேண்டும் என்றும் சிவனேசன் வலியுறுத்தினார்.

மேலும், மருத்துவ நிபுணத்துவப் பயிற்சியைப் பெறுவதற்கான வாய்ப்புகளை மேம்படுத்துதல், குறிப்பாகப் பணியாளர் பற்றாக்குறையால் அதிக சுமையை எதிர்கொள்ளும் மருத்துவமனைகளில் வேலைப்பளுவைக் குறைத்தல் மற்றும் மருத்துவர்களின் உடல், மன நலனைப் பாதுகாக்கும் நடவடிக்கைகளை மேற்கொள்ளுதல் ஆகியவை மருத்துவர்களை அரசுச் சேவையில் தக்கவைத்துக்கொள்ள உதவும் என்றும் அவர் கூறினார்.

அரசு சுகாதாரத் துறையில் பணியாற்றும் மருத்துவர்களுக்குப் பணிப் பாதுகாப்பு மட்டுமே போதாது. அவர்களின் பங்களிப்பை மதிக்கும், தொழில்முறை வளர்ச்சிக்கு ஆதரவளிக்கும், அவர்களின் நலனைப் பாதுகாக்கும் பணிச்சூழலும் அவர்களுக்குத் தேவை.

“மருத்துவர்களைத் தக்கவைத்துக்கொள்ளாமல் புதிதாக ஆட்சேர்ப்பு செய்வது, ஒருபுறம் வெளியேறுபவர்களுக்குப் பதிலாக மற்றவர்களை நியமித்துக்கொண்டே இருக்கும் முடிவில்லாத சுழற்சியாகும். ஏற்கெனவே பணியில் இருப்பவர்கள் அதிகரித்து வரும் வேலைப்பளுவைச் சுமந்துகொண்டிருக்கும்போது, மலேசியாவால் தொடர்ந்து மருத்துவர்களை இழப்பதைத் தாங்கிக்கொள்ள முடியாது,” என்றும் அவர் தெரிவித்தார்.

புதன்கிழமையன்று சுகாதார அமைச்சர் டாக்டர் சுல்கெப்ளி அகமது கூறுகையில், பதவி விலகிய மருத்துவர்களில் 51.4 விழுக்காட்டினர் தனியார் துறைக்குச் சென்றுள்ளனர். 36.8 விழுக்காட்டினர் தனிப்பட்ட காரணங்களைக் குறிப்பிட்டுள்ளனர். மேலும், 4.5 விழுக்காட்டினர் சட்டப்பூர்வ அமைப்புகளில் பணியாற்றச் சென்றுள்ளனர்.

மற்றவர்களில் 2.9 விழுக்காட்டினர் வெளிநாடுகளில் பணியாற்ற அல்லது குடியேறுவதற்காகப் பதவி விலகியுள்ளனர். 2.6 விழுக்காட்டினர் உடல்நலக் காரணங்களுக்காகவும், 1.5 விழுக்காட்டினர் மேற்படிப்பைத் தொடர்வதற்காகவும் பணியை விட்டுச் சென்றுள்ளனர். மேலும், 0.3 விழுக்காட்டினர் சொந்தமாக மருத்துவமனைகள் அல்லது கிளினிக்குகளைத் தொடங்குவதற்காகப் பதவி விலகியுள்ளனர்.

மருத்துவப் பணியாளர் பற்றாக்குறையைச் சமாளிக்கும் நோக்கில், இந்த ஆண்டு 4,500 ஒப்பந்த மருத்துவர்களுக்கு நிரந்தரப் பணி நியமனம் வழங்கப்பட்டுள்ளதாக அமைச்சர் தெரிவித்தார்.

மேலும், பணியாளர் பற்றாக்குறை தொடர்பான பிரச்சினைகளை ஆராய்வதற்காகப் பொதுச் சேவைத் துறையால் ஏப்ரல் மாதத்தில் அமைக்கப்பட்ட பணிக்குழு தனது ஆய்வுகளை மேற்கொண்டு வருவதாகவும் அவர் கூறினார்.

அத்துடன், ஆட்சேர்ப்பு நடவடிக்கைகளை விரைவுபடுத்தும் நோக்கில், அங்கீகரிக்கப்பட்ட பணியிடங்களை நிர்வகிப்பதற்கும் அவற்றை முறையாகப் பகிர்ந்தளிப்பதற்கும் தனது அமைச்சகத்துக்கு அதிக அதிகாரம் வழங்கப்பட்டுள்ளதாகவும் சுகாதார அமைச்சர் தெரிவித்தார்.