நியூ ஸ்ரேய்ட்ஸ் டைம்ஸ் சென்.  பெர்ஹாட்டின்  முன்னாள்  ஆசிரியர் அப்துல்  காடிர்  ஜாசின், தாம் பிரதமர் நஜிப் அப்துல் ரசாக் பொருளாதாரத்தை நிர்வகித்து வரும் முறையைக் குறைகூறியது  சரியான  ஒன்றே என்கிறார். நாடு  நல்லதொரு  பொருளாதாரத்தைப்  பெற்றிருக்க  விமர்சனங்கள் அவசியம்  என்றும் அவர் குறிப்பிட்டார்.

பொருளாதாரம் நல்ல  முறையில்  நிர்வகிக்கப்படவில்லை  என்பதே  அவரது  கருத்தாகும்.

முன்பு, முன்னாள் பிரதமர்  அப்துல்லா அஹ்மட் படாவி  உதவித் தொகைகளைக் குறைத்தபோது அவரைத்  தாம்  குறைகூறியிருப்பதாக  அப்துல் காடிர்  அவரது  வலைப்பதிவில் கூறினார்.

இருவருமே ஊதாரித்தனமாக  செலவு  செய்வதில்  ஆர்வம் காட்டினார்கள் ஆனால்,  பொருளாதாரத்தை  நிர்வகிப்பதில்  சோடை போனார்கள் என்றவர்  குற்றம் சாட்டினார்.

மேலும் அவர், நஜிப் என்ன தவறே இழைக்காத புனிதரா என்றும்  வினவினார்.

“நஜிப்பும்  அவரது  அரசாங்கமும்  ஒன்றை  மறந்துவிடக் கூடாது.  மக்கள்தாம்  அவர்களைத் தேர்ந்தெடுத்தனர். மக்கள்  ஒன்றும்  விலைகளைக்  குறைப்போமே  தவிர  உயர்த்த  மாட்டோம்  என்றெல்லாம்  வாக்குறுதி  அளிக்கவில்லை.

“அந்த வாக்குறுதியை வழங்கியவர்  நஜிப்.  அப்படி என்றால்  அந்த வாக்குறுதியை  இப்போது  மீறுகிறவர் யார்?”, என அப்துல்  காடிர்  வினவினார்.

தமது  பின்னூட்டங்களையும்  விமர்சனங்களையும்  அரசாங்கத்தின்மீதான கண்டனங்களாகக்  கருதக்கூடாது  எனவும் அவர்  கேட்டுக்கொண்டார்.