முன்னாள்  அமைச்சர்  ஒருவரின்  முன்னாள்  உதவியாளர்கள்  இருவர்மீது  1Azam திட்டம்  தொடர்பில்   வழக்குத்  தொடராமல்  சட்டத்துறைத்  தலைவர்  தாமதப்படுத்தி  வருவது  மலேசிய  ஊழல்-தடுப்பு  ஆணையத்துக்கு(எம்ஏசிசி)  வழக்கு  தொடரும்  அதிகாரம்  தேவை  என்பதை  உறுதிப்படுத்துகிறது.

அவ்விருவரும்  நீதிமன்றத்தில்  நிறுத்தப்படுவர்  என்று  எம்ஏசிசி  கடந்த  வாரம்  நம்பிக்கையுடன்  அறிவித்திருந்தது,  ஆனால்,  சட்டத்துறைத்  தலைவர்  இதுவரை  அவர்களை  நீதிமன்றத்தில்  நிறுத்தவில்லை  என   பிகேஆர்  வியூக  இயக்குனர்  ரபிஸி  ரம்லி  கூறினார்.

“இவ்வழக்கில்  அரசியல்  குறுக்கீடு  இருக்கும்போல்  தெரிகிறது”,  என இன்று  செய்தியாளர்  கூட்டமொன்றில்  ரபிஸி  தெரிவித்தார்.

கடந்த  வாரம்  எம்ஏசிசி  வெளியிட்ட  அறிக்கை  ஓன்று,  டத்தோ  பட்டம்  கொண்ட  முன்னாள்  அரசியல்  செயலாளர்  ஒருவரும்  அவரது  தலைமையில்   செயல்படும்  ஒரு  அறநிறுவனத்தின்  இயக்குனர்  ஒருவரும்  ரிம1.1 மில்லியன்  மோசடி  செய்ததாகவும்  மேலும்  ரிம1 மில்லியனை  ஏமாற்றியதாகவும்  குற்றம்  சாட்டப்படுவார்கள்  எனக்  கூறியது.