போலீஸ்  நிலையங்களில்  தடுத்து  வைக்கப்படுபவர்கள்  உடல்நலத்துடன்  இருப்பது  பற்றி  போலீசார்  கவலைப்படுவதில்லையே  அது  ஏன்  என்று  மனித  உரிமைக்காக  போராடும்  என்ஜிஓ-வான  சுவாராம்  கேள்வி  எழுப்பியுள்ளது. 

திங்கள்கிழமை  நிபோங்  தெபால்  போலீஸ்  நிலையத்தில்  கைதி  ஒருவர் இறந்துபோனதைச்  சுட்டிக்காட்டிய  அந்த  என்ஜிஓ, அந்த  நிலையத்தின்  பொறுப்பதிகாரி  அவரது  லாக்-அப்  நாள்குறிப்பேட்டை  ஆய்வுக்குச்  சமர்ப்பிக்க  வேண்டும்  எனக்  கேட்டுக்கொண்டிருக்கிறது.

“தவறினால்,   சாட்சியங்களைக் கலைத்த  குற்றச்சாட்டுக்கு அந்த  அதிகாரி ஆளாவார்”,  என  சுவாராம்  ஒருங்ணைப்பாளர்  ஆர். தேவராஜன் (வலம்) நேற்று  ஓர்  அறிக்கையில்  கூறி  இருந்தார்.

பிப்ரவரி  5-இல்  கைது  செய்யப்பட்ட  ஆ. புண்ணியவான்,40, ஐந்து  நாள்களுக்குப்  பிறகு திங்கள்கிழமை  காலை  நிபோங்  தெபால்  போலீஸ்  நிலையம்  ஒன்றில்  இறந்து  கிடக்கக்  காணப்பட்டார். 

அதுவே,  2014-இல்  போலீஸ்  காவலில்  நிகழ்ந்த  முதல்  இறப்பாகும்.  போலீசார்  அதைத்  “திடீர்  மரணம்”  என  வகைப்படுத்தியுள்ளனர்.