காஜாங்  இடைத்  தேர்தலில்  தாம்  வெற்றிபெற்றால்  அப்துல்  காலிட்  இப்ராகிம்  மந்திரி  புசாராக   தொடர்வது  உறுதி  என  முன்னாள்  பிரதமர்துறை  அமைச்சர்  ஜைட்  இப்ராகிம் இன்று  செய்தியாளர்  கூட்டம்  ஒன்றில்  கூறினார். 

அன்வார்  சட்டமன்ற  உறுப்பினரானால் அவர்   காலிட்டை  மந்திரி  புசார் பதவியிலிருந்து  வெளியேற்ற  முயல்வார்  என்றாரவர்.

காலிட்டும்  அவரது  அரசும்  மக்களின்  அதிகாரத்தைப்  பெற்றுத்தான்  ஆட்சி  செய்கிறார்கள்.  மக்களிடம்  அவர்கள்  பெற்ற  நம்பிக்கையை  அரசியல்  விளையாட்டின் வழி  அகற்ற  முனைவது  முறையல்ல  என்றவர்  சொன்னார்.

“காலிட்டையும்  அவரின்  குழுவினரையும்  அகற்றுவதாக  இருந்தால் ஜனநாயக  முறைப்படியே  செய்ய  வேண்டும்.  அவரிடம் பலவீனம்  இருக்குமானால்  அல்லது எதிலும்  தோல்வி  கண்டிருந்தால்  அதை வெளிப்படையாக  பேசித்  தீர்வு  காணலாம். 

“சுல்தானின்  அனுமதியுடன்  அதைச்  செய்யலாம். ஒரு  பொறுப்பான  தலைமைத்துவம் அப்படி  வெளிப்படையாக  நடந்துகொள்வதைத்தான்  21-ஆம்  நூற்றாண்டு  மக்களும்  எதிர்பார்க்கிறார்கள்”. 

இதையெல்லாம்  கருத்தில்  கொண்டு,  ஆரோக்கியமான  ஜனநாயக்  கோட்பாடுகளுக்கு  மதிப்பளிக்கும்  வகையிலும்  அரசியல்  நிலைத்தன்மையை  உறுதிப்படுத்தவும்  அன்வாரை  மந்திரி  புசாராக்கும்  பிகேஆரின்  திட்டத்தை  சிலாங்கூர்  வாக்காளர்  முறியடிக்க  வேண்டும்  என  ஜைட்  கேட்டுக்கொண்டார்.