ஜப்பானிய  நிறுவனமொன்று  சரவாக்  முதலமைச்சர்  அப்துல்  தாயிப்  மஹமுட்  குடும்பத்தாருக்குச்  சொந்தமான  நிறுவனத்துக்குக்  கையூட்டு  கொடுத்ததாகக்  கூறப்படும்  விவகாரத்தை  ஜப்பானிய  அதிகாரிகள்  மீண்டும்  விசாரிக்கத்  தொடங்க  வேண்டும்  என  சரவாக்  ரிப்போர்ட்  வலியுறுத்தியுள்ளது.

2007-இல், ஜப்பானிய  வருமான வரித்துறை  அதிகாரிகள்  மேற்கொண்ட  விசாரணையில் ஜப்பானிய  கப்பல்  நிறுவனம்  தாயிப்பின்  சகோதரருக்குச்  சொந்தமான  ஹாங்காங்கிலிருந்து  செயல்படும்  ரீஜெண்ட்  ஸ்டார்  நிறுவனத்துக்கு  ரிம32 மில்லியன் “கமிஷன்”  வழங்கியிருப்பது  தெரிய  வந்தது.

சரவாக்கிலிருந்து   ஜப்பானுக்கு வெட்டுமரம்  ஏற்றுமதி  செய்வதற்கு  உரிமங்கள்  பெற்றுத்தந்ததற்குக்  கைம்மாறாக  அப்பணம்  கொடுக்கப்பட்டதாக  தெரிகிறது. 

ஆனால்,  கப்பல்  நிறுவனம்  வரி கொடுப்பதைத்  தவிர்க்க  அதைத்  “தரகர்  சேவைக்கான கட்டணம்”  என்று  கூறிக்கொண்டது. ஜப்பானிய  அதிகாரிகளுக்கு  அது  திருப்தி  அளிக்கவில்லை. அவர்கள்  அதைக்  “கையூட்டு”  என்றனர். 

ஆனால்,  அவர்கள்  தொடுத்த  வழக்கை  நீதிமன்றம்  தள்ளுபடி  செய்தது. 

இப்போது  சரவாக்  ரிப்போர்ட்  தன்னிடம்   புதிய  தடயம்  இருப்பதாகக்  கூறுகிறது  அதை  வைத்து ஜப்பான்  போலீசில்  புகார்   செய்யப்போவதாகவும்  அதை  அடிப்படையாக  வைத்து  ஜப்பானிய  அதிகாரிகள்  மேல்  நடவடிக்கை  எடுக்க  வேண்டும்  எனவும்  கேட்டுக்கொண்டிருக்கிறது.