சேவைகளின்  தரம்  உயர்ந்திருப்பதை  உறுதிப்படுத்திக் கொள்ளாமல்  தனியார் மருத்துவக்  கட்டணத்தை  உயர்த்தி  இருக்கக்கூடாது  என்று  மலேசிய  பயனீட்டாளர்  சங்கக்  கூட்டமைப்பு (போம்கா)  கூறுகிறது.

2011-இல், போம்கா மருத்துவக்  கவனிப்புப்  பற்றி  882  புகார்களைப்  பெற்றதாகக்  கூறிய  அதன்  உதவித்  தலைவர் ரத்னா  தேவி  நடராஜன்,  அவற்றில் பெரும்பகுதி  தனியார்துறை  பற்றியதாகும்  என்றார்.

“தனியார்  மருத்துவ மனைகளில்தான்  மேம்பட்ட  சேவை  வழங்கப்படுகிறது  என்ற  ஒரு கருத்து  உள்ளது.  ஆனால், அங்குதான்  மருத்துவர்களின்  கவனிப்பு  நன்றாக  இல்லை,  சிகிச்சைக்கான  காரணங்கள்  தெரிவிக்கப்படுவதில்லை,  பணத்துக்காக  தேவையில்லாத  சோதனைகள்  செய்யப்படுகின்றன,  தப்பான  அளவுகளில்  மருந்துகள்  கொடுக்கப்படுகின்றன  என்றெல்லாம்  புகார்கள்  வருகின்றன”,  என்றவர்  சொன்னார்.

இப்போது  மருத்துவக்  கட்டணம்  உயர்த்தப்பட்டிருப்பதால்  அதற்கேற்ப  அவர்களின்  சேவைத்  தரமும்  உயர  வேண்டும்  என்றவர்  வலியுறுத்தினார்.