தீர  விசாரிக்காமல்  எம்எச்370  விமானி  கேப்டன்  ஸஹாரி  அஹமட்மீது  பழி  சுமத்தக்கூடாது  என்று  எதிரணித்  தலைவர்  அன்வார்  இப்ராகிம்  ஊடகங்களையும்  அதிகாரிகளையும்   கேட்டுக்கொண்டிருக்கிறார். ஸஹாரி  ஒரு  “நல்ல  குடும்பஸ்தர்”  என்றாரவர்.

இன்று  நாடாளுமன்ற  வளாகத்தில்  செய்தியாளர்  கூட்டமொன்றில்  பேசிய  அன்வார்,  ஸஹாரி  தம்  மைத்துனியின்  உறவினர்  என்பதை  ஒப்புக்கொண்டார்.  1981-இலிருந்து  எம்ஏஎஸ்-ஸில்  வேலை  செய்யும்  அவரைப்  பல  பிகேஆர்  நிகழ்வுகளில்  சந்தித்திருப்பதாகவும்  அவர்  சொன்னார்.

“நீதியின்மீது  மிகவும் விருப்பம்  கொண்டவர்  அவர்”,  என  அன்வார்  கூறினார்.

குதப்புணர்ச்சி  வழக்கில்  தமக்கெதிராக அளிக்கப்பட்ட  தீர்ப்பைக்  கண்டிக்கும்  வகையில்தான்  ஸஹாரி  எம்எச்370-ஐக்  கடத்திச்  சென்றார்  என்று  கூறப்படுவதைக்  கேலி  செய்தார்  அன்வார்.

“டெக்சி  ஓட்டுனர்களில் 90 விழுக்காட்டினர்  எங்கள்  ஆதரவாளர்கள்தான்.  அதற்காக  எல்லாரும்  டெக்சிகளை   காஜாங்குக்குக்  கடத்திச்  செல்லவில்லையே”,  என்றாரவர்.