இன்று காலையில் தொடங்கிய காஜாங் சட்டமன்ற இடைத் தேர்தலில் 39,278 வாக்காளர்கள் வாக்களிக்க தகுதி பெற்றுள்ளனர். இது ஒரு பல்லின தொகுதியாகும். முன்னதாக வாக்களிக்கும் தகுதி பெற்ற 1,188 வாக்காளர்கள் கடந்த புதன்கிழமை வாக்களித்து விட்டனர். எஞ்சியுள்ள 38,055 வாக்காளர்கள் இன்று வாக்களிப்பர்.

மொத்த வாக்காளர்களில் 80 விழுக்காட்டிற்கு மேற்பட்டவர்கள் இந்த இடைத் தேர்தலில் வாக்களிப்பார்கள் என்று தேர்தல் ஆணையம் எதிர்பார்க்கிறது.

2013 ஆண்டு பொதுத் தேர்தலில் பிகேஆர் இத்தொகுதியை கிட்டத்தட்ட 7,000 வாக்கு பெரும்பான்மையில் வென்றது. வெற்றி பெறுவார் என்று கூறப்படும் பிகேஆரின் வான் அஸிசா வான் இஸ்மாயில் இப்பெரும்பான்மையை அதிகரிப்பாரா என்று வினவப்படுகிறது.

பிஎன் வேட்பாளர் மசீசவின் சியு மெய் ஃபன் இத்தொகுதியின் 41 விழுக்காட்டு சீன வாக்காளர்களிடம் மசீசவின் செயற்திறனை நிரூபிக்க வேண்டியுள்ளது.

வாக்களிப்பு மாலை மணி 5 க்கு முடிவுறும். அதன் பின்னர் இத்தொகுதியின் 18 வாக்களிப்பு மையங்களிலிருந்து வாக்குப் பெட்டிகள் காஜாங் முனிசிபல் கவுன்சில் ஸ்டேடியத்திற்கு கொண்டு வரப்படும்.

இன்று காலை மணி 7.00 லிருந்தே வாக்காளர்கள் பல்வேறு இடங்களில் காணப்படனர். அவர்களில் ஒருவர் சுங்கை சுவா புதிய கிராமத்தின் நுழைவாயிலில் ஒரு கட்டு கங்கோங் கீரையைப் பிடித்துக் கொண்டிருந்து பலரின் கவனத்தை ஈர்த்தார்.

அஹமட் என்று மட்டும் அடையாளம் காணப்பட்ட அந்த 64 வயதான பிகேஆர் ஆதரவாளர் பகாங்கிலிருந்து வந்து இங்குள்ள ஆதரவாளர்களுடன் சேர்ந்து கொண்டதாக கூறினார்.

“இங்குள்ள வாக்காளர்களுக்கு ஒன்றை நினைவூட்ட விரும்புகிறேன். பிரதமர் நஜிப் அப்துல் ரசாக் சீனியின் விலை உயர்வுக்கு வழிவகுத்தார். ஆனால், கங்கோங் விலை குறைவாக இருக்கிறது என்று கூறியதன் வழி அவர் மக்களை இழிவுபடுத்தினார்.

“இதை நாம் இனிமேலும் அனுமதிக்க முடியாது”, என்று அவர் வலியுறுத்தினார்.

இத்தொகுதியின் பல்வேறு பகுதிகளில் பின் ஆதரவாளர்கள் அதிகமாகக் கூடியிருப்பது காணப்பட்டது.

ஓர் இடத்தில், பெர்காசா மற்றும் அம்னோ இளைஞர் பிரிவுகளின் தலைவர்களுடன் பல இளைஞர்கள் மோட்டார் சைக்களில் வந்திறங்கினர்.

இக்கூட்டத்தினர் பிகேஆர் நாடாளுமன்ற உறுப்பினர் ஆர். சிவராசா மற்றும் பிகேஆர் இளைஞர் பிரிவு தலைவர் ரோஸான் அஸென் ஆகியோரை திருப்பிப் போகுமாறு கத்தினர்.

இதற்கு முன்னதாக, ஏன் பிஎன் சின்னங்களை கொண்டிருக்கும் பிஎன் கார்கள் வாக்காளர்களை வாக்களிப்பு மையங்களின் வாசல் வரையில் ஏற்றிச் செல்ல அனுமதிக்கப்படுன்றது என்று ரோஸான் போலீசாரிடம் வினவிய போது சலசலப்பு ஏற்பட்டது.

இம்மாதிரியான சில சம்பவங்களுக்கிடையே வாக்களிப்பு சுமுகமாக நடந்து கொண்டிருக்கிறது.

வெற்றியாளர் யார் என்பது இன்றிரவு மணி 9.00 வாக்கில் தெரிய வரும்.