அரசாங்கம்  செய்யும்  முடிவுகளுக்கு  அமைச்சரவைதான்  கூட்டுப் பொறுப்பேற்க  வேண்டும். அந்த  வகையில்  மெமாலி  நிகழ்வுக்கும்  1985-இல்  இருந்த  அமைச்சரவைதான்  முழுப்  பொறுப்பு  என்கிறார்  அரசமைப்பு  நிபுணர்  அப்துல்  அசீஸ்  பாரி.

முன்னாள் துணைப்  பிரதமர்  வெளியிட்ட  தகவல்  குறித்து  கருத்துரைத்த  அசீஸ்  பாரி (இடம்),   கூட்டுப்  பொறுப்பு  என்கிறபோது  அப்போதைய  பிரதமர்  டாக்டர்  மகாதிர்  முகம்மட்  மட்டுமல்ல  அப்போது விவசாய  அமைச்சராக  இருந்த  அன்வார்  இப்ராகிமும்கூட  அதற்குப்  பொறுப்பேற்க  வேண்டும்  எனக்  கூறினார்.

“நாடாளுமன்றத்துக்குப்  பதில்சொல்லும்  கூட்டுப்  பொறுப்பு  அமைச்சரவையினுடையது  என்று  அரசமைப்புப்  பகுதி  43(3),  கூறுகிறது.”,  என்றாரவர்.

மூசா,  இன்று  மலேசியாகினியில் வெளியிடப்பட்ட  அறிக்கை  ஒன்றில்,  கெடாவில்  1985, நவம்பர்  19-இல்  நான்கு  போலீசாரும்  14  சிவிலியன்களும்  பலியான  மெமாலி சம்பவம்  நிகழ்ந்தபோது மகாதிர்  நாட்டில்தான்  இருந்தார்   என்றும்  அந்த  உண்மையைச்  சொல்ல   அம்னோவோ  அரசாங்கமோ  தயாராக  இல்லை  என்றும்  கூறி  இருந்தார்.

முடிவில், கிளந்தானில்  நடந்த  ஒரு  நிகழ்வுதான்  அதை  வெளிப்படுத்தும் வாய்ப்பைத்  தமக்கு  அளித்ததாக  முன்னாள்  உள்துறை  அமைச்சருமான  மூசா  கூறினார்.