காலஞ்சென்ற கர்பால் சிங்குக்கு மரியாதை தெரிவிக்க மலேசியர்கள் ஆயிரக்கணக்கில் இன்று டேவான் ஸ்ரீ பினாங்கில் கூடினர்.
காலை மணி 7.30க்கே டேவானில் கூட்டம் நிரம்பி வழிந்தது. 8.15 அளவில் கர்பாலின் பிண ஊர்வலம் டேவான் ஸ்ரீ பினாங் வந்துசேர்ந்தது. அவரது நல்லுடல் டேவானுக்குள் எடுத்துச் செல்லப்பட்டு பொதுமக்கள் இறுதி மரியாதை தெரிவிக்கக் கிடத்தி வைக்கப்பட்டது.
பின்னர், டிஏபி கட்சி உறுப்பினர்களும் பொதுமக்களும் டேவானுக்குள் அனுமதிக்கப்பட்டனர். பலர் கர்பாலின் உடலை வலம் வந்து பிரார்த்தனை செய்தனர்.இன்னும் பலர் மலர்களை வைத்து அஞ்சலி செலுத்தினர்.
கூட்டத்தில் பினாங்கு முதல்வர் லிம் குவான் எங், அவரின் தந்தையும் டிஏபி மூத்த தலைவரிமான லிம் கிட் சியாங், பிகேஆர் நடப்பில் தலைவர் அன்வார் இப்ராகிம் முதலானோரைக் காண முடிந்தது.
காலை ,மணி 10.30 அளவில், டேவான் ஸ்ரீ பினாங்கில், பினாங்கு ஆளுநர் அப்துல் ரஹ்மான் அப்பாஸ், கர்பாலுக்கு இறுதி மரியாதை தெரிவித்துக்கொண்டார்.
11.50க்குச் சவ ஊர்வலம் டேவான் ஸ்ரீ பினாங்கிலிருந்து பத்து கந்தோங்கை நோக்கிப் புறப்பட்டது. பிற்பகல் 1 மணி அளவில் அவரது உடல் தகனம் செய்யப்படும்.
