தெலுக் இந்தான் நாடாளுமன்ற இடைத்தேர்தலில் பிஎன் வேட்பாளராக கெராக்கான் கட்சியின் தலைவர் மா சியு கியோங் களமிறங்குகிறார்.

இன்று பின்னேரத்தில் தெலுக் இந்தானில் பிஎன் வேட்பாளராக மா சியு கியோங் போட்டியிடுவார் என்று துணைப் பிரதமர் முகைதின் யாசின் அறிவித்தார்.

மா சியு கியோங் இத்தொகுதியை 1999 லிருந்து 2008 ஆம் ஆண்டு வரையில் தம் வசம் வைத்திருந்தார். 2008 ஆம் ஆண்டில் டிஎபியின் எம். மனோகரன் அவரை குறுகிய வாக்கு வித்தியாசத்தில் தோற்கடித்தார்.

மா மீண்டும் 2013 இல் அத்தொகுதியில் போட்டியிட்டு டிஎபியின் சியா லியோங் பெங்கிடம் 7,313 வாக்கு வித்தியாசத்தில் தோல்வி கண்டார்.

சியா கடந்த மே 1 இல் புற்றுநோயின் காரணமாக காலமானதைத் தொடர்ந்து இத்தொகுதி காலியாகியுள்ளது.

அரசியலுக்கு புதியவரான டிஎபியின் டியானா சோபியாவுடன் மா, 53, இப்போது மோதவிருக்கிறார்.