இஸ்லாத்தையும்  சிலாங்கூர்  சுல்தானையும்  அவமதிப்போரின்  “தலை துண்டிக்கப்படும் ” என்று  கூறியதற்காக  பல  தரப்பினரின்  கண்டனத்துக்கு  ஆளான  பெர்காசா  தகவல்  தலைவர்  ருஸ்லான், இப்போது  “ஒரு  பேச்சுக்காகவே”  அப்படிச்  சொல்லியதாக  கூறிக்கொள்கிறார்.

தலை  துண்டிக்கப்படும்  என்று  கூறியது  உண்மைதான்.  ஆனால், எம்பிகளான  காலிட்  சமத் (ஷா  ஆலம்), டாக்டர்  சித்தி  மரியா  மஹ்மூட்(கோத்தா  ராஜா), ஹனிபா  மைடின் (செப்பாங்),  சே  ரோஸ்லி  சே  மாட் (ஹுலு  லங்காட்)  ஆகியோரின்  அரசியல்  வாழ்க்கையைக்  “கொல்லும்”  அர்த்தத்திலேயே அவ்வாறு  சொன்னதாக  ருஸ்லான் விளக்கம்  அளித்துள்ளார்.

“நான்  தலையை ‘pancung’ (வெட்டுவது)  செய்வது  பற்றிச்  சொல்ல  நினைக்கவில்லை. அவர்களின்  அரசியல் வாழ்க்கையை  ‘pancung’ செய்வது  பற்றித்தான்  சொல்ல  நினைத்தேன். தவறுதலாக ‘pancung leher'(கழுத்தை வெட்டுதல்) என  வந்து  விட்டது”.

“நாங்கள்  ஒன்றும்  கத்தியைத்  தீட்டிக்  கொண்டிருக்கவில்லை. எங்களுக்கு அமைதிதான் பிடிக்கும்.  இணக்கமாக  வாழ்வதுதான்  பிடிக்கும்”,  என்று  கூறிய  ருஸ்லான்  மலேசியாகினிதான்  அதைப்  பெரிதுபடுத்தி விட்டது  என்றார்.