இந்திரா காந்தியின் முன்னாள் கணவர் நீதிமன்ற உத்தரவுப்படி குழந்தையை அவரிடம் ஒப்படைக்க மறுப்பதற்காக போலீசார் அவரை கைது செய்யப்போவதில்லை என்று போலீஸ்படைத் தலைவர் காலிட் அபு பாக்கார் கூறுகிறார்.

மாறாக, அவரை கண்காணிப்பதற்காகவும் குழந்தை பாதுகாப்பாக இருப்பதை உறுதிப்படுத்துவதற்காகவும் பேராக் போலீசார் அவரை தேடி வருகின்றனர் என்று காலிட் கூறினார்.

சிவில் அல்லது ஷரியா நீதிமன்றத்தின் தீர்ப்பு எதனையும் அமல்படுத்தபோவதில்லை என்ற அதன் நிலைப்பாட்டிலிருந்து போலீஸ் பின்வாங்கப்போவதில்லை என்று காலிட் கூறியதாக பெர்னாமா செய்தி கூறுகிறது.

தீபா மற்றும் அவரது முன்னாள் கணவர் இஸ்வான் அப்துல்லா என்ற என். வீரன் விவகாரத்திலும் போலீஸ் அதே நிலைப்பாட்டை கொண்டுள்ளது என்றும் காலிட் கூறுகிறார்.

“ஆகவே, நாங்கள் இரு நீதிமன்றங்களின் தீர்ப்பு எதனையும் அமலாக்கப் போவதில்லை. அது எங்களுடைய நிலைப்பாடு”, என்றார் காலிட்.

அவரது நிலைப்பாடு நீதிமன்ற அவமதிப்பாகாதா என்ற கேள்விக்கு பதில் அளித்த காலிட், “அது குறித்து நீதிமன்றங்கள் முடிவு செய்ய வேண்டும்”, என்றார்.