ஸ்ரீ  டெலிமா  சட்டமன்ற  உறுப்பினரின்  வீட்டில்  மாட்டுத்  தலை  வீசி  எறியப்பட்டிருந்த  சம்பவம்  குறித்த  உள்துறை  அமைச்சர்  அஹமட்  ஜாஹிட்  ஹமிடியின்  கருத்து  இந்துக்களின்  மனத்தைப்  புண்படுத்தும்  கருத்து  என  கெராக்கான்  சாடியுள்ளது.

ஆர்.எஸ்.என். இராயரின்  வீட்டின்  முன்புறம்  வெட்டப்பட்ட  மாட்டுத்  தலை வீசி  எறியப்பட்டிருந்தது  பற்றிக்  கருத்துரைத்த  ஜாஹிட்,  அது  “அம்னோ  செலாகா”  என்றுரைத்ததற்காக  அவர்  கொடுத்த  “விலை”  என்று  கூறி இருந்தார்.

உள்துறை  அமைச்சர்  என்ற  முறையில்  ஜாஹிட்  அமைதியையும்  இணக்கத்தையும்  வளர்க்க  வேண்டுமே  தவிர  வன்முறையை  ஊக்குவிக்கக்  கூடாது  என  கெராக்கானின்  சட்ட  விவகார,  மனித  உரிமைப்  பிரிவுத்  தலைவர்  பல்ஜிட்  சிங்  குறிப்பிட்டார்.

“இது  இந்துக்களை  உணர்ச்சிவசப்பட  வைக்கும்  சம்பவம். உள்துறை  அமைச்சர்  பொறுப்புடன்  நடந்து  கொள்ள  வேண்டும்.

“வெவ்வேறு  சமயத்தவரிடையே  பகைமையைத் தூண்டிவிடக்கூடாது.  அதுவும்  நோன்பு  மாதம்  தொடங்க  இன்னும்  ஒரு  நாள்  உள்ள  வேளையில்  அப்படியெல்லாம்  அவர்  செய்யக்கூடாது”,  என பல்ஜிட்  மலேசியாகினியிடம்  தெரிவித்தார்.