பிகேஆர் கட்சியிலிருந்து தாம் நீக்கப்பட்டதில் குறைபாடுகள் இருப்பதோடு அது சட்டவிரோதமானது என்று கூறிய சிலாங்கூர் மாநில மந்திரி புசார், தாம் தொடர்ந்து மந்திரி புசாராக இருக்கப் போவதாக சூளுரைத்தார்.

“பிகேஆர் கட்சியின் உறுப்பியத்திலிருந்து என்னை நீக்கியதில் குறைபாடுகள் இருப்பதோடு அது சட்டவிரோதமானது”, என்று காலிட் கூறினார்.

“இப்பிரச்சனை சரியான நடைமுறைகள், சட்டங்கள் மற்றும் பொதுவாக சம்பந்தப்பட்டவர்களால் ஏற்றுக்கொள்ளப்பட அரசியல் நடைமுறை, குறிப்பாக சிலாங்கூர் அரசமைப்புச் சட்டம், ஆகியவற்றுக்கு ஏற்ப தீர்க்கப்படுகிற வரையில், நான் சிலாங்கூர் மந்திரி புசாராக மக்களுக்கு என்னால் இயன்ற அளவுக்கு எனது கடமையை ஆற்றுவேன்”, என்று இன்று மாலையில் விடுத்த ஓர் அறிக்கையில் காலிட் கூறியுள்ளார்.

காலிட் சிலாங்கூர் சுல்தானை காணப் போவதாக கூறினார். அவரும் சிலாங்கூர் சுல்தானும் நாளை ஷா அலாமிலுள்ள மசூதியில் நடைபெறும் ஒரு நிகழ்ச்சியில் கலந்து கொள்கின்றனர்.