1மலேசியா  மேம்பாட்டு  நிறுவன(1எம்டிபி) விவகாரத்தில்  முன்னுக்குப் பின்  முரணாக  அறிக்கைகள் வெளியிட்டு  வந்துள்ள  நிதி  துணை  அமைச்சர்  அஹ்மட்  மஸ்லானுக்கு எதிராக  நடவடிக்கை  எடுக்க  வேண்டும்  என்பதில் உறுதியாகவுள்ள  பாண்டான்  எம்பி  ரபிஸி  ரம்லி, அதற்குத் தேவையான  ஆவணங்களை  நாடாளுமன்றத்தின்  அவைத்  தலைவரிடம்  ஒப்படைத்திருக்கிறார்.

1எம்டிபி  ரிம9.6பில்லியன்  கடனுக்குப்  பொறுப்பேற்று  அரசாங்கம்   ஆதரவுக் கடிதம்  வழங்கியதே  இல்லை  என்று  அஹ்மட் கடந்த  வியாழக்கிழமை   நாடாளுமன்றத்தில்  கூறினார்.

ஆனால்,  இன்று   ரபிஸி  ஓர் அறிக்கையில்,   அஹ்மட்  அக்கடிதம் இருப்பதை  அறிந்தே  இருந்தார்  எனக்  கூறினார்.  அதற்கு,  முன்பு  அவர்  ஊடகங்களிடம்  கூறியவையே  சான்றாகும்  என்றார்.

அவையில்  தவறான  தகவல்கள்  தெரிவித்தமைக்காக  அஹ்மட்டை உரிமைகள் மற்றும்  சலுகைகள்  குழுவுக்குக் கொண்டு  செல்ல  வேண்டும்  என்ற  தீர்மானத்துக்கு  ஆதரவாக  அவைத்  தலைவரிடம்  ஆவணங்களை ஒப்படைத்திருப்பதாக ரபிஸி  கூறினார்.

“எனது  தீர்மானம்மீது  அவைத்  தலைவர்  என்ன  முடிவெடுத்தாலும்  நானும் என் பக்கத்தான்  ரக்யாட்  சகாக்களும்  1எம்டிபி கடன்  பிரச்னையை அம்பலப்படுத்தும்  முயற்சிகளைத்  தொடர்வோம்”, என்றாரவர்.