சங்கங்கள் பதிவகத்தின் உத்தரவுப்படி கட்சியின் பதவிகளுக்கு மறுதேர்தல் நடத்தப்படும் என்பதை மஇகா உறுதிப்படுத்தியது. ஆனால், கட்சியின் தலைவர் மற்றும் துணைத் தலைவர் ஆகியோரின் பதவிக்கு மறுதேர்தல் இல்லை.

2013 ஆண்டு நடைபெற்ற கட்சியின் தேர்தலில் தலைவர் ஜி. பழனிவேல் மற்றும் துணைத் தலைவர் டாக்டர் எஸ். சுப்ரமணியம் ஆகியோர் போட்டியின்றி தேர்வு பெற்றனர்.

இதனை இன்று மஇகா தலைமையகத்தில் அறிவித்த டாக்டர் சுப்ரமணியம் இச்சம்பவம் மஇகாவுக்கு ஒரு “கரும் தினம்” என்று கூறினார்.

சங்கங்களின் பதிவகம் மத்திய செயற்குழு மற்றும் உதவித் தலைவர்கள் பதவிக்கு மறுதேர்தல் நடத்த வேண்டும் என்று உத்தரவிட்டுள்ளதாக அவர் கூறினார்.

நடந்து முடிந்த கட்சி தேர்தலில் காணப்பட்ட முறைகேடுகள் பற்றிய விபரங்களை தருமாறு வலியுறுத்தப்பட்டதற்கு பதிலாக மஇகா தேர்தலில் கட்சி அதன் சட்டங்களையும் சங்கங்கள் சட்டத்தையும் பின்பற்றத் தவறிவிட்டது என்று மட்டும் அவர் கூறினார்.

சங்கங்கள் பதிவகத்தின் கடிதத்தில் மஇகா மறுதேர்தல் நடத்த வேண்டும், பதிய தேர்தல் அல்ல என்று கூறப்பட்டுள்ளது. ஆகவே, இந்த மறுதேர்தலில் வேட்பாளர்கள் கடந்த ஆண்டு தேர்தலில் நியமிக்கப்பட்ட அதே வேட்பாளர்கள்தான் இருப்பார்கள் என்று அவர் மேலும் கூறினார்.

மஇகாவின் மறுதேர்தல் 90 நாள்களுக்குள் நடத்தப்பட வேண்டும். கட்சி தலைவர் ஜி. பழனிவேல் வெளிநாட்டிலிருந்து வியாழன் அல்லது வெள்ளிக்கிழமை நாடு திரும்புகிறார். அதன் பிறகு இது குறித்து விவாதிக்கப்படும் என்றாரவர்.