சரவாக்கில் அதிரடி  நடவடிக்கைகளில்  இறங்கிய  மலேசிய  ஊழல்தடுப்பு  ஆணையம் (எம்ஏசிசி) அம்னோ  அமைச்சர்களின்  உதவியாளர்களையும்  விசாரிக்க  வேண்டும்  என்று விரும்புகிறார்  அம்னோ  தொகுதித்  தலைவர்  ஒருவர்.

தம்  பெயரை   வெளியிடக்  கூடாது  என்ற  நிபந்தனையுடன்  மலேசியாகினியிடம்  பேசிய  அவர், அமைச்சர்களின்  அரசியல்  மற்றும்  தனிச்  செயலாளர்களில்  சிலர்  வரவுக்குமீறிய  வசதிகளுடன்  வாழ்வதாகக்  கூறினார்.

“ஆடம்பரத்தில்  திளைக்கும்  அளவுக்கு  அவர்களுக்கு  எங்கிருந்து வருமானம்  வந்தது. அவர்களுக்கு வருமானத்தைத்  தரும்  மூலாதாரங்கள்  எவை?

“ஆடம்பர  வீடுகளை  வைத்திருக்கிறார்கள். அவர்களின்  சம்பளத்தை  வைத்து  அவற்றை  வாங்கியிருக்க  முடியாது.

“ஒரு  வதந்தி  என்னவென்றால்……சிலர்  அவர்களின் ‘போஸை’ச் சந்திக்க  விரும்புவார்களாம். அதற்கு  ஏற்பாடு செய்தால் அவர்களுக்குச்  ‘சலுகைகள்’ கிடைக்குமாம்.”, என்றாரவர்.

சில  பெயர்களையும்  அவர்  குறிப்பிட்டார். அவற்றை வெளியிடுவதற்கில்லை.

பிரதமர்துறை செயலாளர்களும் இதில்  சேர்த்தியாம்.

கட்சிக்குக்  களங்கத்தை  உண்டுபண்ணும்  இப்படிப்  பட்டவர்களுக்கு  எதிராக  நடவடிக்கை  எடுக்கப்பட  வேண்டும்  என்று அந்த  அம்னோ  தலைவர்  வலியுறுத்தினார்.

“அவர்கள்  அம்னோவை  அழிக்கிறார்கள்”, என்றுரைத்த  அவர் அவர்களின்  சொத்து  விவரங்களைப்  பொதுவில்  அறிவிக்கும்படிச்  செய்வதுகூட  நல்லதுதான்  என்றார்.