பிகேஆர்  உதவித்  தலைவர்  ரபிஸி  ரம்லி, 1எம்டிபி  தொடர்பாக  பொய்யான ஆவணங்கள்  தயாரிக்கப்பட்டதாகக்  கூறப்படும் விவகாரத்தில்  தம்மையும்  தொடர்புப்  படுத்திச்  செய்யப்பட்ட  போலீஸ் புகாரை ஒரு “கொடிய  சதி”  என்று  நிராகரித்தார்.

போலீஸ்  புகாரில்  சரவாக்  ரிப்போர்டின்  “முன்னாள்  செய்தி ஆசிரியர்”  என்று  கூறப்பட்டுள்ள   லெஸ்டர்  மெலாஞி-யைச்  சந்தித்ததே  இல்லை  என்றும் அவர்  மறுத்தார்.

“லெஸ்டரை  மெலாஞியைச் சந்திக்கவுமில்லை  தொடர்புகொள்ளவும்  இல்லை. அப்துல்  ரஹ்மான்  டஹ்லான்(பிஎன் வியூகத்  தொடர்பு  இயக்குனர்)  போலீஸ்  புகார்  பற்றித் தெரிவித்தபோதுதான்  அப்படி  ஒருவர்  இருப்பதே  தெரிய  வந்தது.

“சர்வாக்  ரிப்போர்டிடம்  என்ன  செய்ய  வேண்டும்  என்று  சொன்னதுமில்லை,  அவர்கள்  வெளியிடுவதற்காக தகவல்  எதுவும்  கொடுத்ததுமில்லை”, என  ரபிஸி  ஓர்  அறிக்கையில்  கூறினார்.

சரவாக்  ரிப்போர்ட்  ஆசிரியர்  கிளேர்  ரியுகாஸல்  பிரவுனுடன் தொடர்பு  வைத்துள்ளதாகக்  கூறப்படுவதையும்  அவர்  மறுத்தார்.

“சரவாக்  ரிப்போர்டுடன்  நான்  ஒத்துழைத்தது  ஒரே  முறைதான்,  சாபா வெட்டுமர  ஊழல்  விவகாரத்தில் மட்டுமே”, என்றாரவர்.