1எம்டிபி  மீது கூறப்படும்  குற்றச்சாட்டுகள்  அனைத்துமே  ஜோடிக்கப்பட்டவை  என்றும்  எதிரணித்  தலைவர்கள்  பலர்  அதன்  பின்னணியில்  இருப்பதாகவும்  லெஸ்டர்  மெலாஞி காணொளி  ஒன்றில்  கூறியுள்ளார்.

லெஸ்டர்,  தாம்  சரவாக்  ரிப்போர்டில்  வேலை  செய்ததாகவும்  கிளேர்  ரியுகாஸலைத்  தலைமைச்  செய்தியாசிரியராகக்  கொண்டு  செயல்படும்  அந்த   இணையத்  தளத்துக்குச்  செய்திகளை  இட்டுக்கட்டிக்  கொடுப்பது  தம்  பொறுப்பு  என்றும்  கூறினார்.

“1எம்டிபி  திட்டம்  பற்றி  இவ்வாண்டு  ஜனவரியில்  கிளேர்  என்னிடம்  தெரிவித்தார். அன்வார்  இப்ராகிமுக்காக  முக்கியமான  பணியைச்  செய்ய  வேண்டியிருப்பதாக  அவர்  சொன்னார்.

“நான்  அதைச்  செய்ய  வேண்டும்  என்றும் (டிஏபி  எம்பி)  டோனி  புவாவும்  (பிகேஆர்  உதவித்  தலைவர்) ரபிஸி(ரம்லி)-யும்  சொல்வதுபோல்  செய்ய  வேண்டும்  என்றும்  கூறினார்”, என  லெஸ்டர்  குறிப்பிட்டார். அவரது காணொளி  இப்போது  முகநூலில்  வலம்  வந்து  கொண்டிருக்கிறது.

ஆனால், லெஸ்டர்  சரவாக்  ரிப்போர்டில்  வேலை  செய்ததே  இல்லை  என்கிறார்  ரியுகாஸல்.

ரபிஸியும், லெஸ்டர்  கூறியிருப்பதை  மறுத்திருக்கிறார். இது 1எம்டிபி-மீதும்  பிரதமர்  நஜிப்  அப்துல்  ரசாக்  மீதுமுள்ள  கவனத்தைத்  திசை திருப்புவதற்கான  சூழ்ச்சி  என்று  அவர்  ஓர்  அறிக்கையில்  கூறினார்.

காணொளியில்  லெஸ்டர்,   சரவாக்  ரிப்போட் அன்வார்மீதுள்ள  “அன்பால்” 1எம்டிபி  பற்றித்  தப்புத்தப்பான  தகவல்களை  இட்டுக்கட்டி  வெளியிட்டு  வந்ததாகக்  கூறியிருந்தார்.