கெடா  மாநிலத்தில்  மந்திரி  புசார்  முக்ரிஸ்  மகாதிரை  வெளியேற்ற  ஒருங்கிணைத்த  முயற்சி  மேற்கொள்ளப்பட்டு  வருவதால்   அங்கு  எதிரணி  புதிய  அரசாங்கத்தை  அமைக்கும்  வாய்ப்பு  இருப்பதாகக் கருதுகிறார்  அரசியல்  ஆய்வாளர்  ஒருவர்.

அம்னோ  சட்டமன்ற  உறுப்பினர்களில்  நால்வர்  அல்லது  ஐவர்  ஆதரவு   கொடுத்தால்  போதும்  எதிரணி  ஒரு  சிறு  பெரும்பான்மையில்  புதிய  அரசாங்கத்தை  அமைத்து விடலாம்  என  யுனிவர்சிடி  உத்தாரா (யுயுஎம்) விரிவுரையாளர்  அஸிஸுடின்  முகம்மட்  சனி  கூறினார்.

கெடா  சட்டமன்றத்தில்  பிஎன்னுக்கு  21 இடங்கள்,  எதிரணிக்கு  15 இடங்கள்.

முக்ரிசுக்கு  எதிரணியினர்  ஆதரவு  இருந்தால்கூட  அவரால்  தொடர்ந்து  மந்திரி  புசாராக  இருக்க  முடியும்.

ஆனால்,  பிஎன்  சட்டமன்ற  உறுப்பினர்களில்  எத்தனை  பேர்  முக்ரிசை  ஆதரிக்கிறார்கள்  என்று  தெரியவில்லை.

“முக்ரிசை  மந்திரி  புசார்  பதவியிலிருந்து  அகற்ற  19 சட்டமன்ற  உறுப்பினர்கள்  அவரை  நிராகரிக்க  வேண்டும்”, என  அஸிஸுடின்  மலேசியாகினியிடம்  தெரிவித்தார்.

“அதே  வேளை  நான்கு  அல்லது  ஐந்து  அம்னோ  சட்டமன்ற  உறுப்பினர்கள்  எதிரணியினருடன்  சேர்ந்து  முக்ரிசுக்கு  ஆதரவு  தெரிவித்தால்  அவர்  தொடர்ந்து  மந்திரி  புசாராக  இருப்பது  சாத்தியமே”, என்றாரவர்.