தேசிய போலீஸ் படைத் தலைவர் காலிட் அபு பக்கார் 1எம்டிபி ஊழல் பற்றியும் அதில் தொழிலதிபர் ஜோ லவ்வுக்குள்ள தொடர்பு பற்றியும் ஆகக் கடைசித் தகவல்களைத் தெரிவிக்க வேண்டும் என்று வலியுறுத்தப்பட்டுள்ளது.
இவ்விவகாரம் தொடர்பில் தாம் 2014 டிசம்பரில் செய்த புகார் என்னவாயிற்று என பத்து கவான் அம்னோ தொகுதி முன்னாள் துணைத் தலைவர் கைருடின் அபு ஹசான் தெரிந்து கொள்ள விரும்புகிறார்.
முன்னாள் பிரதமர் டாக்டர் மகாதிர் முகம்மட்மீது புகார்கள் செய்யப்பட்ட இரண்டாவது நாளிலேயே அவர்மீது விசாரணை தொடங்கி இருப்பதாக போலீஸ் அறிவித்திருப்பதால் தம்முடைய புகார் என்னவாயிற்று என்று அவர் விளக்கம் கேட்டிருக்கிறார்.
“புகார்தாரர் என்ற முறையில் விளக்கம் பெற எனக்கு உரிமை உண்டு. போலீசார் விசாரணைக்காக லவ்வை அழைத்தார்களா?
“அழைத்திருந்தால் எப்போது அழைத்தார்கள்? விசாரணை என்னவாயிற்று? அழைக்கவில்லை என்றால் ஏன் இல்லை? நான் புகார் செய்து நீண்ட காலமாகிறதே”, என கைருடின் ஓர் அறிக்கையில் கூறினார்.
