நாடாளுமன்றத்தில்    இரண்டாவது    வாசிப்புக்குக்     கொண்டுவருவதற்கு    முன்பு,    1976  சட்ட  சீரமைப்பு (திருமணம்,  மணவிலக்கு)ச்  சட்டம்   அல்லது   சட்டம்   164இன்   உத்தேச   திருத்தங்களை   மறுபரிசீலனை   செய்ய    வேண்டும்   என்று  பாஸ்   தலைவர்   அப்துல்   ஹாடி   ஆவாங்  கோரிக்கை   விடுத்துள்ளார்.

சிவில்   திருமணத்தைக்  கட்டுப்படுத்தும்    அச்சட்டம்,  சிவில்  நீதிமன்றத்தில்  ஒரு  முஸ்லிமின்  உரிமைகள்,  ஒரு  குழந்தையின்   சமயத்  தகுதி,  அதைப்  பராமரிக்கும்  உரிமை,  ஜீவனாம்சம்,  சொத்து  பகிர்வு  ஆகியவற்றுடன்   தொடர்புடையது   என்று  ஹாடி  கூறினார்.

“சட்டம்  164க்குக்  கொண்டுவரப்படும்   திருத்தங்கள்   கடுமையான   தாக்கத்தை   ஏற்படுத்தும்   என்பது  பாஸின்  கருத்து. குறிப்பாக,  கூட்டரசு  அரசமைப்பில்   கூறப்பட்டுள்ளபடி   எந்தவொரு   தரப்பின்  குறுக்கீடுமின்றி   தங்களின்  சமயத்தைப்  பின்பற்றவும்   தற்காக்கவும்   முஸ்லிம்களுக்குள்ள  உரிமையை   அது  பாதிக்கும்”,  என்றார்.

கடந்த   நவம்பரில்  முதல்  வாசிப்புக்கு   வந்த   அச்சட்டத்  திருத்த  வரைவு,  ஒரு  குழந்தை,   பெற்றோர்   ஒருவரின்  மதமாற்றத்துக்கு  முன்பு    எந்தச்  சமயத்தைச்   சார்ந்திருந்ததோ   அந்தச்   சமயத்திலேயே   தொடர்ந்து   இருக்கும்   என்ற  விதியைக்  கொண்டுள்ளது.

குழந்தைகள்   வளர்ந்து  பெரியவர்கள்  ஆகி   18-வயதை   எட்டியதும்   அவர்கள்  விரும்பும்   சமயத்தைப்  பின்பற்றலாம்.

பெற்றோரில்  ஒருவர்   மதம்  மாறும்போது   சிறார்கள்   ஒருதலையாக   மதமாற்றம்   செய்யப்படுவதால்    எழும்   விவகாரங்களைக்   கருத்தில்   கொண்டே   அச்சட்டத்   திருத்தம்   கொண்டு   வரப்பட்டுள்ளது.

இதற்கு  வேறொரு  தீர்வை,   இப்போது  பரிந்துரைக்கப்பட்டிருப்பதைவிட   மேலும்  நியாயமான,  விரிவான,  எல்லாவற்றையும்   உள்ளடக்கிய    தீர்வு   ஒன்றை   முன்மொழிய  சிறப்புக்குழு  ஒன்று  அமைக்கப்பட   வேண்டும்   என  ஹாடி  கூறினார்.

அதில்  முஸ்லிம்களும்  முஸ்லிம்   அல்லாதாரும்  இடம்பெற   வேண்டும்.   அது  தேசிய  பாட்வா  மன்றம்,   மலேசிய   ஷியாரியா   நீதிமன்றத்  துறை,    என்ஜிஓ-கள்   முதலானோரின்  கருத்துகளையும்   செவிமடுக்க   வேண்டும்.