கடந்த வெள்ளிக்கிழமை பெவிலியன் ரெசிடென்ஸ் கொண்டோமினியத்தில் பறிமுதல் செய்யப்பட்ட பணத்தைக் கணக்கிடும் பணி இன்னும் முடிவுக்கு வரவில்லை என இன்ஸ்பெக்டர்- ஜெனரல் அப் போலீஸ் முகம்மட் பூஸி ஹருன் த ஸ்டாரிடம் இன்று தெரிவித்தார்.
புக்கிட் அமான் வணிகக் குற்றப் புலனாய்வுத் துறை (சிசிஐடி) மே 21 அதிகாலையில் பணத்தை எண்ணத் தொடங்கியது என்று ஒரு வட்டாரம் தெரிவித்தது.
இன்னும் எவ்வளவு பணம் எண்ணப்பட வேண்டியுள்ளது என்பது உறுதியாக தெரியவில்லை, ஆனால் சிசிஐடி அதிகாரிகள் பேங்க் நெகரா போன்ற அரசுத்துறைகளின் உதவியுடன் கைப்பற்றப்பட்டவற்றை இன்னும் கணக்கிட்டுக் கொண்டிருப்பதாக அந்த நாளேடு கூறிற்று.
“பல நாட்டு நோட்டுகள் உள்ளன என்பதால் கணக்கிடுவது சிரமமாக உள்ளது. ஒவ்வொரு நோட்டின் எண் வரிசையையும் பதிவு செய்ய வேண்டியுள்ளது”, என்று ஒரு வட்டாரம் தெரிவித்தது.
கடந்த வெள்ளிக்கிழமை போலீசார் முன்னாள் பிரதமர் நஜிப் அப்துல் ரசாக்குடன் தொடர்புள்ள இரண்டு கொண்டோமினியத்திலிருந்து 72பைகளில் பணம், நகைகள் ஆகியவற்றையும் 284 அட்டைப் பெட்டிகளில் ஆடம்பர கைப்பைகளையும் எடுத்துச் சென்றனர்.
போலீசார் நஜிப்புடன் தொடர்புள்ள மொத்தம் ஆறு வீடுகளில் அதிரடிச் சோதனை நடத்தியுள்ளனர். அவற்றில் ஒன்றுதான் பெவிலியன் ரெசிடென்ஸ் . கோலாலும்பூரில் ஜாலான் லங்காக் டுட்டாவில் உள்ள நஜிப்பின் இல்லத்திலும் ஸ்ரீ பெர்டானாவிலும்கூட சோதனைகள் நடந்துள்ளன.
