மங்கோலியப் பெண், அல்தான்துயா ஷரிபூ படுகொலை தொடர்பாக, பி.பாலசுப்ரமணியத்தின் மனைவி, ஏ.செந்தமிழ்ச் செல்வி தாக்கல் செய்த வழக்கில், தீபக் ஜெய்கிஷனின் முதல் தற்காப்பு அறிக்கையை கோலாலம்பூர் உயர் நீதிமன்றம் இன்று ஏற்றுக்கொண்டது.
கடந்த ஆண்டு அக்டோபர் 25-ம் தேதி, வழக்கறிஞர் அமிரிக் சிடுவிடம் அந்தத் தற்காப்பு அறிக்கை வழங்கப்பட்டது.
தீபக், தனது புதிய வழக்கறிஞர் வினோத் கமலமதன் வழி, இன்று செந்தமிழ்ச் செல்வியின் வேண்டுகோளுக்கு இணக்கம் தெரிவித்தோடு, கடந்தாண்டு நவம்பர் 7 அன்று, மூத்த வழக்கறிஞர் முகமட் ஷஃபீ அப்துல்லா தாக்கல் செய்த, இரண்டாவது தற்காப்பு அறிக்கை நிராகரிக்கப்பட்டதையும் ஏற்றுக்கொண்டார்.
தீபக்கைப் பிரதிநிதிக்க ஷாஃபிக்கு எந்த அதிகாரமும் இல்லை என, அனைத்து தரப்பினரையும் அறையில் சந்தித்த பின்னர், நீதிபதி ஹூய் சியூ கேங் முடிவு செய்தார்.
