இன்று, சுமார் 1000 பேர் கலந்துகொண்ட ‘உம்மா எழுச்சி பேரணி’ பக்காத்தான் ஹராப்பான் அரசாங்கத்தின் மீது மக்கள் மகிழ்ச்சியாக இல்லை என்பதைக் காட்டுகிறது என்று முன்னாள் பிரதமர் நஜிப் கூறியுள்ளார்.

14-ம் பொதுத் தேர்தலில் வெற்றிபெற்று, ஆட்சியில் அமர்ந்த ஹராப்பான் அரசாங்கத்தால் மேற்கொள்ளப்பட்ட சில நடவடிக்கைகள் நாட்டின் மலாய் மற்றும் இஸ்லாமிய அமைப்புக்களை அச்சுறுத்துவது வெளிப்படையாக தெரிவதாக கூறப்படுகிறது.

“விரும்பாத சில விஷயங்களில் கோபங்கொண்ட அவர்கள், இயல்பாக இந்தப் பேரணியில் கலந்துகொண்டனர்.

“மே 9-ம் தேதி முதல், அவர்கள் செய்த சில நடவடிக்கைகளின் காரணமாக, அவர்களுக்கு மக்கள் ஆதரவு குறைந்துள்ளது,” என அவர் இன்று சுங்கை காண்டிஸ்-இல் செய்தியாளர்களிடம் தெரிவித்தார்.

இன்று காலை, கோலாலம்பூர் சுல்தான் சுலைமான் கிளப்பில் நடந்த உம்மா எழுச்சி பேரணியில், 300 மலாய்-முஸ்லிம் அரசு சாரா அமைப்புகள் கலந்துகொண்டதாகக் கூறப்படுகிறது.

அம்னோ – பாஸ் தலைவர்களுடன், முன்னாள் அமைச்சரும், தற்போது பெர்சத்து உறுப்பினருமான ராய்ஸ் யாத்திமும் அப்பேரணியில் கலந்துகொண்டார்.

ராய்ஸ் யாத்திம்-இன் வருகை குறித்து கருத்துரைக்கையில், ‘அவர் ஒரு மொழி போராளி’ என்றார் நஜிப்.

“ஒருவேளை அவர் இந்தப் பேரணிக்கு வரவில்லை என்றால், அவரின் நம்பகத்தன்மை கேள்விக்குறி ஆகிவிடும்,” என்றார் அவர்.