இடிந்து விழுந்த கோண்டோ தளத்தை பார்வையிட்ட தெரசா கோக்கிடம் சரமாரி கேள்வி

கோலாலம்பூரில் உள்ள தாமான் டேசாவில் இடிந்து விழுந்த காண்டோமினியத்தின் கட்டுமான இடத்தை பார்வையிட்டபோது, அருகிலுள்ள காண்டோமினியத்தில் வசிப்பவர்கள் பலரால் செபுத்தே எம்.பி. தெரசா கோக் கேள்விகளால் தாக்கப்பட்டார்.

அண்மையில் கட்டிடம் இடிந்து விழுந்ததைத் தொடர்ந்து ‘The Address’ கட்டுமானப் பணிகள் நிறுத்த உத்தரவிடப்பட்ட நிலையில், அந்த இடத்திற்கு வந்த கோக் ஊடகங்களை சந்தித்தார்.

இந்த சம்பவத்தை விமர்சித்த எம்.சி.ஏ செய்தித் தொடர்பாளர் சான் குயின் எர் மீதான விமர்சனங்களுக்கு பதிலளித்த கோக், பக்காத்தான் ஹராப்பான் ஆட்சிக்கு வருவதற்கு முன்பாகவே இந்த திட்டத்திற்கு ஒப்புதல் அளிக்கப்பட்டுள்ளது என்றார்.

“திட்டத்தின் மேம்பாட்டு உத்தரவு (DO), மார்ச் 13, 2017 அன்று டி.பி.கே.எல் ஒப்புதல் அளித்துள்ளது. மேலும் கட்டிடத் திட்டத்திற்கு ஜூன் 19, 2017 அன்று ஒப்புதல் அளிக்கப்பட்டுள்ளது. கட்டுமானம் பிப்ரவரி 2018-இல் தொடங்கியது. இவை அனைத்தும் எனது காலத்திற்கு முன்பே (அரசாங்கத்தில்) தொடங்கியுள்ளன. அதை அங்கீகரித்தவர் நான் அல்ல” என்று அவர் கூறினார்.

பத்திரிகையாளர் சந்திப்பில், கோக் செய்தியாளர்களுடன் பேசிக் கொண்டிருந்தபோது சில குடியிருப்பாளர்கள் தங்கள் விமர்சனங்களைத் தெரிவித்து தொந்தரவு செய்ய முயன்றனர். இருப்பினும், அவர்கள் மேலும் கேள்விகளைக் கேட்கவிடாமல் தடுக்கப்பட்டனர்.

புறப்படுவதற்கு முன்பு கோக் பல குடியிருப்பாளர்களை சந்திப்பதாக உறுதியளித்தார்.

அவர்களில் 5 பேர் பின்னர் செய்தியாளர்களிடம் கோக் அலுவலகத்தில் இருந்து தாமான் டேசாவைக் காப்போம் என்ற சங்கத்தால் ஏற்பாடு செய்யப்பட்ட பொதுமக்களுடன் ஒரு கூட்டத்திற்கு அவரை அழைத்தபோது எந்த பதிலும் பெறத் தவறிவிட்டதாக தெரிவித்தனர்.

“அவர் எங்களுடன் சிறிது நேரம் செலவழித்திருக்க வேண்டும், கடந்த இரண்டரை ஆண்டுகளாக நாங்கள் அவருடன் ஒரு சந்திப்பை நடத்த முயற்சிக்கிறோம்,” என்று கோங் கே.ஒய் கூறினார். அவர் தன்னை செப்புத்தே கிளை டி.ஏ.பி.யின் முன்னாள் துணைத் தலைவராக அடையாளம் காட்டிக்கொண்டார்.

தெரசா கோக்கின் உதவியாளர் பின்னர் “நீங்கள் கட்சியிலிருந்து நீக்கப்படவில்லையா?” என்று கோங்குடன் வாய் சண்டையில் ஈடுபட்டார். நேற்று, கோங் பல எம்.சி.ஏ. தலைவர்களுடன் ஒரு பத்திரிகையாளர் சந்திப்பை நடத்தி, மக்கள் நலன்களை கோக் புறக்கணித்ததாக புகார் கூறினார்.