பொது இடங்களில் முகக்கவரிகளை பயன்படுத்துவதை கட்டாயப்படுத்த அரசாங்கம் பரிசீலித்து வருவதாக பிரதமர் முகிதீன் யாசின் இன்று தெரிவித்தார்.

எவ்வாறாயினும், இந்த விவகாரம் குறித்த விவரங்களை அரசாங்கம் இறுதி செய்த பின்னர் அறிவிக்கப்படும் என்று முகிதீன் கூறினார்.

முன்னதாக, முகிதீன் தனது சிறப்பு செய்தியில், முகக்கவரிகள், கூடல் இடைவெளி மற்றும் நெரிசலான இடங்களைத் தவிர்ப்பது போன்ற வழக்கமான இயக்க நடைமுறைகளை (எஸ்ஓபி) புறக்கணிக்கும் பொதுமக்களை கண்டித்தார்.

“நான் எப்போதும் அனைத்து சகோதர சகோதரிகளுக்கும் கைகுலுக்காமல் இருக்க அறிவுறுத்துகிறேன். இப்போது கைகுலுக்குவது மட்டுமல்லாமல், நண்பர்களையும் உறவினர்களையும் சந்திக்கும் போது கட்டிப்பிடிப்பவர்களும் இருக்கிறார்கள் என்பதை நான் காண்கிறேன்,” என்று அவர் கூறினார்.

கோவிட்-19 பாதிப்புகளின் எண்ணிக்கை குறைந்துவிட்டாலும் புதிய நடைமுறை தொடர வேண்டும் என்று அவர் கூறினார்.

“கூடல் இடைவெளி தொடர வேண்டும். உங்கள் தூரத்தை மற்றவர்களிடமிருந்து குறைந்தபட்சம் ஒரு மீட்டர் தொலைவில் வைத்திருங்கள்.”

“நெரிசலான இடங்களைத் தவிர்க்கவும், உடல் தொடர்பைத் தவிர்க்கவும் எப்போதும் நினைவில் கொள்ளுங்கள்,” என்றார்.

அதே நேரத்தில், தனிநபர்கள், பெற்றோர்கள், கல்வி நிறுவனங்கள் மற்றும் பணியிடங்கள் உள்ளிட்ட அனைத்து தரப்பினரும் ஒருவருக்கொருவர் ஆலோசனை கூறி நினைவூட்டி, கோவிட்-19 தொற்றுநோய் பரவுவதைத் தடுப்பதில் பங்கு வகிக்க வேண்டும் என்றார்.

“வீட்டை விட்டு வெளியேறும்போது எப்போதும் முகக்கவரியை அணிய வேண்டும் என்று பெற்றோர்கள் எப்போதும் தங்கள் குழந்தைகளுக்கு நினைவூட்ட வேண்டும். கூடல் இடைவெளியை பேணவும், எப்போதும் கைகளை கழுவவும், நெரிசலான இடங்களைத் தவிர்க்கவும், கைகுலுக்க வேண்டாம் என்றும் அவர்களுக்கு நினைவூட்டுங்கள். ஒவ்வொரு நாளும் அவர்களுக்கு நினைவூட்டுங்கள். நாம் அனைவரும் நம் குடும்பங்களை நேசிப்பதே இதற்குக் காரணம்,” என்றார்.

பணியிடத்தில், முதலாளிகள் எப்போதும் தங்கள் ஊழியர்களை கண்காணிக்கவும் பணியாளர்களை SOPக்கு இணங்கவும் நினைவூட்ட வேண்டும் என்றும் அவர் கூறினார்

“பள்ளிகளில், தலைமை ஆசிரியர்கள், ஆசிரியர்கள், மற்றும் மாணவத் தலைவர்கள் இந்த செயலில் பங்கு வகிக்க வேண்டும்.”

கிராமத் தலைவர்கள், மத தலைவர்கள் மற்றும் சமூகத் தலைவர்களையும் அவர் நினைவுபடுத்தினார்.