அடுத்த ஆண்டு பிப்ரவரி 24 ஆம் தேதி கோலாலம்பூரில் நடைபெறவிருக்கும் பாலஸ்தீனத்துடனான ஒருமைப்பாட்டின் அடையாளமாக ஒரு மாபெரும் பேரணியில் ஏறக்குறைய ஒரு மில்லியன் மலேசியர்கள் பங்கேற்க இலக்கு வைக்கப்பட்டுள்ளனர்.

பாலஸ்தீனத்திற்கான மில்லியன் ‘மக்கள் பேரணி’ என அழைக்கப்படும் இந்த நிகழ்ச்சி, பாலஸ்தீன மக்களின் போராட்டத்திற்கு ஆதரவை தெரிவிப்பதையும், காஸாவில் போரை உடனடியாக நிறுத்துமாறு அழைப்பு விடுப்பதையும் நோக்கமாகக் கொண்டதாக மலேசிய இஸ்லாமிய அமைப்புகளின் ஆலோசனைக் குழு (Mapim) தலைவர் முகமட் அஸ்மி அப்துல் ஹமிட் தெரிவித்தார்.

பேரணியில் 1,000 தன்னார்வ தொண்டு நிறுவனங்களை இணைத்துக்கொள்ளவும் திட்டமிட்டுள்ளோம் என்றார் பேரவை ஒருங்கிணைப்பாளர்.

அமெரிக்கத் தூதரகத்திற்கு முன்பாகப் பெரிய அளவிலான பேரணியை நடத்துவதற்கான இடம் தொடர்பான திட்டமிடல் கட்டத்தில் தற்போது இருப்பதாக அஸ்மி மேலும் கூறினார். இதைப் பாதுகாப்பாகவும், சுமுகமாகவும் நடத்த அதிகாரிகள் ஒத்துழைக்க வேண்டும் என்று வேண்டுகோள் விடுத்தார்.

“இந்தப் பேரணி, காசா மீதான இஸ்ரேலின் அட்டூழியங்களைத் தொடர்வதிலிருந்து அவசரமாகத் தலையிட்டு நிறுத்துமாறு மலேசிய மக்களிடமிருந்து ஐக்கிய நாடுகள் சபைக்கு (UN) சக்திவாய்ந்த செய்தியை அனுப்பும்,” என்று அவர் இன்று செய்தியாளர் சந்திப்பின்போது கூறினார்.