மலேசிய ஊழல் தடுப்பு ஆணையத்தின் (MACC) தலைமை ஆணையர் அசாம் பாக்கிக்கு எதிராகச் சுமத்தப்பட்டுள்ள பங்குரிமை புகார்கள் குறித்து விசாரணை செய்யும் சிறப்புக் குழுவின் முன் வாக்குமூலம் அளிக்க அவர் அழைக்கப்பட்டுள்ளார். 

 பெறப்பட்ட முதற்கட்ட அறிக்கைகளின் அடிப்படையில், அசாம் பாக்கியின் பங்கு உரிமையிலுள்ள இணக்கம் மற்றும் ஒழுங்குமுறை அம்சங்கள் குறித்து இக்குழு ஆய்வு செய்து வருகிறது.

பெறப்பட்ட அனைத்து ஆதாரங்களையும் மதிப்பீடு செய்யும் பணியில் இக்குழு இன்னும் ஈடுபட்டுள்ளது. இந்த விவகாரம் தொடர்பான விசாரணையை நிறைவு செய்ய மற்ற தொடர்புடைய சாட்சிகளுக்கும் அழைப்பு விடுக்கப்படும்.

இந்த ஒட்டுமொத்த விசாரணையானது வெளிப்படையாகவும், சுதந்திரமாகவும் மற்றும் தொழில்முறை ரீதியாகவும் நடத்தப்படும் என்று இக்குழு உறுதி அளிக்கிறது” என சம்சுல் கூறினார். 

இதன் கண்டுபிடிப்புகள் மற்றும் அடுத்தகட்ட நடவடிக்கைக்கான பரிந்துரைகள் சம்பந்தப்பட்ட அதிகாரிகளிடம் சமர்ப்பிக்கப்படும் என்று அவர் மேலும் கூறினார். 

இந்தச் சிறப்புக் குழுவிற்கு தலைமை வழக்கறிஞர் துசுகி மொக்தார் தலைமை தாங்குகிறார். அவருடன் கருவூலச் செயலாளர் ஜொஹான் மஹ்மூத் மெரிக்கன் மற்றும் பொதுச் சேவை இயக்குநர் வான் அகமது டலான் அப்துல் அஜீஸ் ஆகியோர் இக்குழுவில் இடம்பெற்றுள்ளனர். 

கடந்த ஆண்டு பிப்ரவரி 3-ஆம் தேதி தாக்கல் செய்யப்பட்ட நிறுவனத்தின் வருடாந்திர அறிக்கையின் அடிப்படையில், வெலாசிட்டி கேபிடல் பிஎச்டி நிறுவனத்தில் அசாம் 17.7 மில்லியன் பங்குகளை (1.7%) வைத்திருப்பதாக புளூம்பெர்க் செய்தி நிறுவனம் தெரிவித்திருந்தது. 

மலேசியாவில் பதிவுசெய்யப்பட்ட நிறுவனங்களில் அரசு ஊழியர்கள் தங்களின் செலுத்தப்பட்ட மூலதனத்தில் 5%-க்கு மிகாமலோ அல்லது 100,000 ரிங்கிட் மதிப்பிற்குள்ளோ (எது குறைவோ அது) மட்டுமே பங்குகளை வைத்திருக்க முடியும் என்ற 2024-ஆம் ஆண்டு அரசாங்கச் சுற்றறிக்கையை அசாம் மீறியதாகக் குற்றம் சாட்டப்பட்டுள்ளது. 

இந்தப் பங்குப் பரிமாற்றம் குறித்து முறைப்படி அறிவிக்கப்பட்டுவிட்டதாகவும், கடந்த ஆண்டே அந்தப் பங்குகள் விற்கப்பட்டுவிட்டதாகவும் ஊழல் தடுப்பு ஆணையத் தலைமை ஆணையர் தெரிவித்துள்ளார். மேலும், தன் மீதான அந்தப் புகாரைத் தொடர்ந்து, புளூம்பெர்க் நிறுவனத்திற்கு எதிராக 100 மில்லியன் ரிங்கிட் இழப்பீடு கோரி அவரது வழக்கறிஞர்கள் வழக்குத் தொடர்ந்துள்ளனர்.

இருப்பினும், தனது செய்தி அறிக்கையில் எவ்வித மாற்றமும் இல்லை என்றும், அதில் உறுதியாக இருப்பதாகவும் புளூம்பெர்க் நிறுவனம் தெரிவித்துள்ளது.

-fmt