சுமார் 12.6 மில்லியன் ரிங்கிட் சந்தை மதிப்புள்ள கஞ்சா பூ மொட்டுகளை சிலாங்கூர் காவல்துறை பறிமுதல் செய்துள்ளனர்.

ஐரோப்பாவிற்கு கடத்தப்படுவதற்காக இந்த போதைப்பொருள் வைக்கப்பட்டிருந்ததாக நம்பப்படுவதாக சிலாங்கூர் காவல்துறைத் தலைவர் ஷாசெலி கஹார் தெரிவித்தார்.

கடந்த மாத இறுதியில் நடத்தப்பட்ட தனித்தனி சோதனைகளில், சுமார் 12.6 மில்லியன் ரிங்கிட் மதிப்புள்ள கஞ்சா மொட்டுகளை பறிமுதல் செய்த சிலாங்கூர் காவல்துறை, மூன்று போதைப்பொருள் கடத்தல் கும்பல்களை முறியடித்துள்ளது.

ஒரு பெண் உட்பட போதைப்பொருள் கடத்தல்காரர்கள் என நம்பப்படும் ஏழு வெளிநாட்டினர் கைது செய்யப்பட்டுள்ளதாக சிலாங்கூர் காவல்துறைத் தலைவர் ஷாசெலி கஹார் தெரிவித்தார்.

“சந்தேக நபர்களில் அறுவருக்கு போதைப்பொருள் சோதனையில் சாதகமான முடிவு வந்துள்ளது,” என்று அவர் இன்று செய்தியாளர் கூட்டத்தில் கூறினார்.

காவல்துறையினர் 580 ரிங்கிட், 20 யூரோ மற்றும் 80,000 ரிங்கிட் மதிப்புள்ள விலையுயர்ந்த கடிகாரத்தையும் பறிமுதல் செய்தனர்.

ஏப்ரல் 28 முதல் 30 வரை கோலாலம்பூர் சர்வதேச விமான நிலையம் (KLIA) மற்றும் சிப்பாங், கோத்தா வாரிசான் ஆகிய இடங்களில் இந்த சோதனைகள் நடத்தப்பட்டதாக ஷாசெலி கூறினார்.

முதல் சோதனையில், சுமார் 5.4 மில்லியன் ரிங்கிட் மதிப்புள்ள கஞ்சா மொட்டுகள் அடங்கிய 64 பிளாஸ்டிக் பாக்கெட்டுகளை காவல்துறை பறிமுதல் செய்தது. இரண்டாவது சோதனையில், 2.4 மில்லியன் ரிங்கிட் மதிப்புள்ள கஞ்சா மொட்டுகள் என நம்பப்படும் மேலும் 59 பாக்கெட்டுகள் பறிமுதல் செய்யப்பட்டன.

மூன்றாவது சோதனையில், 4.8 மில்லியன் ரிங்கிட் சந்தை மதிப்புள்ள கஞ்சா மொட்டுகள் நிரப்பப்பட்ட 109 பிளாஸ்டிக் பொட்டலங்களைக் கொண்ட நான்கு சூட்கேஸ்களை காவல்துறை பறிமுதல் செய்ததாக ஷாசெலி தெரிவித்தார்.

குற்றப் பின்னணி இல்லாத சந்தேக நபர்களை, ஒரு பயணத்திற்கு 13,000 ரிங்கிட் முதல் 26,000 ரிங்கிட் வரை வழங்குவதாகக் கூறி, இக்கும்பல் கடத்தல்காரர்களாக ஆசை காட்டி ஈர்த்திருக்கலாம் என்று அவர் கூறினார்.

“இந்த போதைப்பொருள் ஐரோப்பாவிற்கு கடத்தப்படவிருந்தது,” என்று கூறிய அவர், இந்த கும்பல் சர்வதேச போதைப்பொருள் கடத்தல் வலையமைப்பைக் கொண்டுள்ளது என்றும், போதைப்பொருள் எங்கிருந்து பெறப்பட்டது என்பதைக் கண்டறிய விசாரணை நடந்து வருவதாகவும் குறிப்பிட்டார்.