போக்குவரத்து அமைச்சர் அந்தோணி லோக், சமீபத்தில் நடைபெற்ற பிரச்சார ஊர்வலத்தின் போது ஹெல்மெட் அணியாமல் மோட்டார் சைக்கிள் ஓட்டிய அரசியல்வாதிகள் மற்றும் தேர்தல் பணியாளர்களுக்கு அபராதம்  விதிக்குமாறு சாலைப் போக்குவரத்துத் துறைக்கு (RTD) உத்தரவிட்டுள்ளார்.

ஜொகூரில் நடைபெற்ற பிரச்சார நடவடிக்கையின் போது, பக்காத்தான் ஹரப்பான் (PH) தலைவர் ஒருவரும் அவரது ஆதரவாளர்களும் ஹெல்மெட் அணியாமல் இருசக்கர வாகனங்களை ஓட்டிச் செல்லும் வீடியோ சமூக ஊடகங்களில் வைரலானது. இதைத்தொடர்ந்து, அமைச்சருக்கு எதிராக இணையத்தில் எழுந்த கடுமையான விமர்சனங்களுக்குப் பிறகு இந்த உத்தரவு பிறப்பிக்கப்பட்டுள்ளது.

இது குறித்து லோக் வெளியிட்டுள்ள அறிக்கையில், சாலை பாதுகாப்புச் சட்டங்கள் தான் தலைவராக இருக்கும் ஹரப்பான் கூட்டணியின் வேட்பாளர்கள் மற்றும் தேர்தல் பணியாளர்கள் உட்பட அனைவருக்கும் பொருந்தும் என்று கூறியுள்ளார்.

“அரசியல் சார்புகளைப் பொருட்படுத்தாமல், வைரலான வீடியோக்களில் உள்ள ஆதாரங்களின் அடிப்படையில் இந்த விதிகளை மீறியதாகக் கண்டறியப்படும் எவருக்கும் அபராதம் விதிக்குமாறு நான் சாலைப் போக்குவரத்துத் துறைக்கு உத்தரவிட்டுள்ளேன்”.

“ஜொகூரில் நடந்த ஹரப்பான் பிரச்சார ஊர்வலத்தில் ஈடுபட்டவர்களும் இதில் அடங்குவர்”.

சட்டம் அனைத்து மலேசியர்களுக்கும் நியாயமாகவும் சமமாகவும் அமல்படுத்தப்பட வேண்டும். எனது சொந்த பிரச்சாரக் கூட்டாளிகள் இதில் ஈடுபட்டிருந்தாலும், இந்த கொள்கையில் நான் எந்த சமரசமும் செய்துகொள்ள மாட்டேன்,” என்று அவர் கூறினார்.

இணையத்தில் பரவி வரும் ஒரு வீடியோவின்படி, ஹெல்மெட் அணியாமல் வாகனம் ஓட்டியதாகக் கூறப்படுபவர்களில் ஜொகூர் DAP துணைத் தலைவர் ஷேக் உமர் பகாரிப் அலியும் ஒருவர்.

இந்த வீடியோ, DAP-இன் புகிட் பெண்டேரா நாடாளுமன்ற உறுப்பினர் சியர்லினா அப்துல் ரஷித் பயணித்த வாகனத்தில் இருந்து பதிவு செய்யப்பட்டதாக நம்பப்படுகிறது.

விமர்சகர்கள் இந்தச் சம்பவத்தை, லோக் 2020 ஆம் ஆண்டு நாடாளுமன்றத்தில் ஆற்றிய உரையுடன் ஒப்பிட்டு ஒரு சிறிய வீடியோவைப் பகிர்ந்துள்ளனர். அந்த உரையில், சிலிம் (Slim) இடைத்தேர்தல் பிரச்சாரத்தின் போது இதேபோன்ற குற்றத்தைச் செய்த தேசிய முன்னணி (BN) தலைவர்களை DAP பொதுச்செயலாளர் லோக் விமர்சித்திருந்தார்.

“பிரச்சாரம் செய்யும் போது மோட்டார் சைக்கிள் ஓட்டுவது பரவாயில்லை, ஆனால் ஹெல்மெட் அணிந்து நல்ல முன்மாதிரியை காட்டுங்கள். அனைவருக்கும் அபராதம் விதியுங்கள்; யாருக்கும் சலுகை காட்ட வேண்டாம், சட்டம் எந்தவொரு பாகுபாடும் இன்றி அமல்படுத்தப்படுகிறது என்பதைக் காட்டுங்கள்,” என்று அவர் அப்போது கூறியிருந்தார்.

சிலிம் பிரச்சாரத்தின் போது ஹெல்மெட் இல்லாமல் மோட்டார் சைக்கிள்களில் காணப்பட்ட முன்னாள் பிரதமர் நஜிப் அப்துல் ரசாக் மற்றும் அம்னோ தலைவர் அகமத் ஜாஹித் ஹமிடி போன்ற தலைவர்களை அவர் அப்போது குறிப்பிட்டிருந்தார்.

புதன்கிழமை அன்று அந்தோணி லோக்கை விமர்சித்து முகநூலில் (Facebook) பதிவிடப்பட்ட பதிவு, 6,200 க்கும் மேற்பட்ட எதிர்வினைகளையும் 1,900 க்கும் அதிகமான பகிர்வுகளையும் பெற்றுள்ளது.

இதற்குப் பதிலளிக்கும் விதமாக, ஷேக் உமர் தனது முகநூல் பக்கத்தில் தனது தவறை ஒப்புக்கொண்டு, அபராதத் தொகையைச் செலுத்துவதாகத் தெரிவித்துள்ளார்.

இது குறித்து கருத்து அறிய மலேசியாகினி சியர்லினாவையும் தொடர்பு கொண்டுள்ளது.

ஹரப்பான் பிரச்சாரப் பிரிவினர் போக்குவரத்து விதிகளை மீறிய விவகாரத்தைத் தொடர்ந்து, தேசிய முன்னணி (BN) தலைவர்களும் இதேபோன்ற குற்றத்தைச் செய்வதைக் காட்டும் மற்றொரு வீடியோ கிளிப் குறித்து மலேசியாகினியின் கவனத்திற்கு கொண்டு வரப்பட்டது.

ஞாயிற்றுக்கிழமையன்று செம்ப்ரோங் நாடாளுமன்ற உறுப்பினர் இஷாமுடின் உசேன் தனது முகநூல் ரீல்ஸில் (Facebook Reels) வெளியிட்ட ஒரு வீடியோவில், அவரும் அம்னோ இளைஞரணித் தலைவர் டாக்டர் அக்மல் சலேயும் ஹெல்மெட் அணியாமல் மோட்டார் சைக்கிள் ஊர்வலத்தில் பங்கேற்பது தெரிந்தது.

பல இணையப் பயனர்களும் அவர்களின் இந்த செயலைக் கேள்வி எழுப்பி கருத்துகளைப் பதிவிட்டுள்ளனர்.

சாலைப் போக்குவரத்துச் சட்டத்தின் கீழ், மோட்டார் சைக்கிள் ஓட்டுபவர்கள் பாதுகாப்பு ஹெல்மெட் அணிய வேண்டும், அவ்வாறு செய்யத் தவறினால் அது அபராதம் விதிக்கப்படக்கூடிய குற்றமாகும்.