நாடு முழுவதும் மோசமடைந்து வரும் புகைமூட்டம் காரணமாக பள்ளிகளை மூடுவது குறித்த முடிவை அந்தந்த மாநிலங்களின் பொறுப்பிலேயே கல்வி அமைச்சு விட்டுவிடுகிறது. தினசரி காற்று மாசுபாடு அளவைக் கண்காணிப்பதற்காக, மாநில மற்றும் மாவட்ட கல்வி அதிகாரிகளை உள்ளடக்கிய பனிமூட்ட கண்காணிப்புக் குழுக்களை அமைக்குமாறு மாநில கல்வி இயக்குநர்களுக்கு உத்தரவிடப்பட்டுள்ளது.

இந்தக் குழு வழங்கும் தகவல்கள் மற்றும் தரவுகளின் அடிப்படையில், பள்ளிகள் வழக்கம் போல் செயல்படுமா அல்லது வீட்டிலிருந்தபடியே கற்பித்தல் மற்றும் கற்றல் முறையில் செயல்படுமா என்பது போன்ற பள்ளிச் செயல்பாடுகள் குறித்த முடிவுகளை மாநில கல்வி இயக்குநர்கள் எடுப்பார்கள், என்று அமைச்சு தனது அறிக்கையில் தெரிவித்துள்ளது.

பள்ளிச் செயல்பாடுகளின் நிலை குறித்து சனிக்கிழமையன்று (பிரிவு A பள்ளிகளுக்கு) மற்றும் ஞாயிற்றுக்கிழமையன்று (பிரிவு B பள்ளிகளுக்கு) மதியம் 2.45 மணிக்கு முன் அறிவிப்பு வெளியிடப்படும். மற்ற நாட்களில், காற்றுத் தூய்மைக்கேட்டுக் குறியீட்டின் (API) அளவுகளின் அடிப்படையில், மாலை 5.45 மணிக்கு முன் இயக்குநர்கள் பள்ளியின் செயல்பாட்டு நிலையை அறிவிப்பார்கள்.

பிரிவு A பள்ளிகள் என்பவை வெள்ளி-சனி வார இறுதியைக் கொண்டவை, மற்றும் பிரிவு B பள்ளிகள் என்பவை சனி-ஞாயிறு வார இறுதியைக் கொண்டவை ஆகும்.

புகைமூட்டம் காரணமாக, பல்கலைக்கழகங்கள், பாலிடெக்னிக்குகள் மற்றும் சமூகக் கல்லூரிகளுக்கு கற்றல் ஏற்பாடுகள் குறித்து தாங்களாகவே முடிவெடுக்கும் தன்னாட்சி அதிகாரம் ஏற்கனவே வழங்கப்பட்டுள்ளது.

மாநிலம் முழுவதும் காற்றின் தரம் மோசமடைந்து வருவதால், ஜொகூரில் உள்ள பள்ளிகள் மற்றும் பிற கல்வி நிறுவனங்கள் திங்கட்கிழமை முதல் மேலும் ஐந்து நாட்களுக்கு மூடப்பட்டிருக்கும் என்று ஜொகூர் மாநில அரசு இன்று அதிகாலை தெரிவித்தது. இருப்பினும், கெடா, கிளாந்தான் மற்றும் திராங்கானு ஆகிய மாநிலங்களில் காற்றின் தரம் கட்டுப்பாட்டிற்குள் இருப்பதால், அங்கிருக்கும் பள்ளிகள் நாளை வழக்கம்போல் இயங்கும் என்று கல்வி அமைச்சு கூறியுள்ளது.

 

 

 

-fmt