தன்மீது குறைகூறிய கெடா மந்திரி புசார் முக்ரிஸ் மகாதிருக்குப் பதிலடி கொடுத்துள்ள கெராக்கான், “உருட்டல், மிரட்டல்களையும்” “பழிவாங்கும் அரசியலையும்” சகித்துக்கொண்டிருக்க முடியாது என்று அறிவித்துள்ளது.

கெராக்கான் தலைமைச் செயலாளர் மா சியு கியோங், நேற்று கெராக்கான் கட்சி குறித்து எதிர்மறையான கருத்து தெரிவித்த பொதுக் கணக்குக் குழு(பிஏசி)த் தலைவர் நூர் ஜஸ்லான் முகம்மட்டையும் சாடினார்.

அம்னோ தலைவர்கள் சிலர், பிஎன்னுக்கு மக்கள் ஆதரவு குறைந்து போனதற்கு கெராக்கான், மசீச போன்றவைதான் காரணம் என்று கூறுவதை வழக்கமாக வைத்திருக்கிறார்கள் என்றாரவர்.

“1999-இல் அன்வார் இப்ராகிம் காரணமாக மலாய்க்காரர்கள்  பிஎன்னுக்கு எதிராக வாக்களித்தபோது அம்னோ தொடர்ச்சியாக மலாய்க்காரர்களைத் தாக்கவில்லையே.  இன்னும் சொல்லப்போனால், மலாய்ச் சமூகத்தின் உணர்வுகளைப் புரிந்துகொண்டு,  ஆதரவுகுறைந்ததற்கான  காரணங்களைக் கண்டறிந்து அவற்றைச் சரிசெய்தது”, என மா குறிப்பிட்டார்.

ஆனால், அண்மைய தேர்தல் முடிவுகளைத் தொடர்ந்து மலேசிய  இந்தியர், சீனர் சமூகங்களிடம் அதேபோன்ற அணுகுமுறை கடைப்பிடிக்கப்படாதது ஏன் என்றவர்  கேள்வி எழுப்பினார்.