மலேசியா,  கல்விக்காக  பில்லியன்  கணக்கில்  செலவிட்டிருந்தாலும்  எதிர்பார்த்த பலன்  கிட்டவில்லை  என்று  முன்னாள்  நிதி  அமைச்சர்  தெங்கு  ரசாலி  ஹம்சா  வருத்தப்படுகிறார்.

குவா  மூசாங்  எம்பியுமான  ரசாலி,  மற்ற  ஆசியான்  நாடுகளைவிடவும்  மலேசியா  கல்விக்காகக்  கூடுதலாக  செலவிடுகிறது  என்றார்.  ஜப்பான்,  கொரியா  ஆகிய  நாடுகள்  2011-இல், செலவிட்டதைக்  காட்டிலும்  மலேசியா  கல்விக்காக  அதிகம்  செலவிட்டிருக்கிறது.

“அவப்பேறாக,  கல்விக்காக  அதிகம்  செலவிட்டும்  பயனில்லை.  தரத்திலும்  ஆக்கத்திறனிலும்  எதிர்பார்த்த  பலன்  கிட்டவில்லை”, என  இன்று  காலை  மலாக்கா யயாசான்  சாஆட் கல்லூரியில் பேசியபோது  அவர்  கூறினார்.

“மலேசியாவில்  சராசரி  தொழிலாளரின்  ஆக்கத்திறன்  மதிப்பு  ஆண்டுக்கு ரிம43,952. அதே  வேளை அமெரிக்காவில்  அது  ஆண்டுக்கு  ரிம285,558  ஆகவும்  ஜப்பானில் ரிம229,568  ஆகவும்,  ஹாங்காங்கில்  ரிம201.485 ஆகவும்  உள்ளது”,  என்று ரசாலி  குறிப்பிட்டார்.

இப்பிரச்னைக்குத்  தீர்வாக,  தொடக்க,  இடைநிலைக்  கல்வியில்  திறன்வளர்ப்புக்கு  முக்கியத்துவம்  கொடுக்கப்பட  வேண்டும்  என்றாரவர்.