பாஸ் கட்சியை பக்கத்தான்  கூட்டணியிலிருந்து   விலக்க  முயற்சி  செய்வதை  விடுத்து  டிஏபி  வேண்டுமானால்  அக்கூட்டணியிலிருந்து  விலகிக்  கொள்ளலாம்  என  கிளந்தான்  துணை  மந்திரி  புசார்  நிக்  அமார் அப்துல்லா  கூறினார்.

பாஸ் தலைவர் அப்துல்  ஹாடி  ஆவாங்  பக்கத்தான்  தலைமைத்துவ  மன்றக்  கூட்டங்களில்  கலந்துகொள்வது  அவசியம்  என   டிஏபி  அழுத்தம் கொடுத்து வருவது  பற்றிக்  கருத்துரைத்தபோது நிக்  அமார்  இவ்வாறு  கூறினார்.

அந்த இஸ்லாமியக்  கட்சியை  பக்கத்தானிலிருந்து  வெளியேற்ற  “சிறுசிறு  விவகாரங்களை” எல்லாம்   டிஏபி  வேண்டுமென்றே   பெரிதுபடுத்துவதாக  அவர் கூறினார்  என  உத்துசான்  மலேசியா  செய்தி  கூறுகிறது.

“லிம் குவான்  குவாங்  விலக  நினைக்கிறாரா,  தாராளமாக விலகட்டும். டிஏபி  விலகிக்கொள்ள  விரும்புகிறதா,  விலகித்  தொலையட்டும்.

“ஆனால், பாஸை  பக்கத்தானிலிருந்து  விலகச்  சொல்லாதீர்கள்”, என்றாரவர்.