மலேசிய இஸ்லாமிய மேம்பாட்டு இலாகா (ஜாகிம்) போன்ற அரசாங்க அமைப்புகள் ஜிகாட் என்றால் என்ன என்பதையும் ஷரியா சட்டங்களையும் முஸ்லிம்கள் கற்றுக்கொள்வதற்கு அவர்களுக்கு விளக்க வேண்டும் என்று பிரதமர் நஜிப் இன்று கூறினார்.

இன்று டாதாரான் பிரதானாவில் அரசாங்க ஊழியர்களின் மாதாந்தர சந்திப்பில் பேசிய நஜிப் முஸ்லிம்கள் “எதைச் செய்யலாம், எதைச் செய்யக் கூடாது” என்பதைப் புரிந்து கொள்வதற்கு அவர்களுக்கு விளக்கங்கள் தேவைப்படுகிறது என்றார்.

எதிர்வரும் மார்ச் மாதத்தில் அரசாங்கம் தாக்கல் செய்யவிருக்கும் பயங்கரவாத எதிர்ப்பு மசோதாவுக்கு முன்னோடியாக அமைகிறது நஜிப் தெரிவித்துள்ள இக்கருத்து.

அதிகமான மலேசியர்கள் இஸ்லாமிய அரசு (ஐஎஸ்) அமைப்பிலும் மத்திய கிழக்கிலுள்ள இதர ஜிகாட் இயக்கங்களிலும் சேர்ந்து வருகின்றனர். இது இந்நாட்டின் பாதுகாப்பிற்கு மிரட்டலாக அமையக்கூடும் என்ற அச்சத்தை ஏற்படுத்தியுள்ளது.