எதிரணித் தலைவர் அன்வார் இப்ராகிம் குற்றவாளி என அளிக்கப்பட்ட தீர்ப்பு பற்றி தெரிவித்த கருத்திற்காக பிஎஸ்எம் தலைமைச் செயலாளர் எஸ். அருட்செலவம் தேச நிந்தனைக்காக இன்று போலீசாரால் கைது செய்யப்பட்டார்.

இன்று மாலை சுமார் 10 போலீஸ்காரர்கள் காஜாங்கில் அருட்செல்வத்தின் வீட்டை திடீர்ச்சோதனை செய்து அவரின் கணினியை கைப்பற்றினர்.

இத்தீடீர்ச்சோதனையின் போது மலேசியாகினியிடம் பேசிய அருட்செல்வம் போலீசார் தம்மை டாங்வாங்கி போலீஸ் நிலையத்திற்கு கொண்டுசெல்வர் என்று கூறினார்.

அருட்செல்வத்தின் அலைபேசி மற்றும் மோடம் ஆகியவற்றையும் போலீசார் கைப்பற்றினர் என்று பின்னர் தொடர்பு கொண்ட போது பிஎஸ்எம்மின் கோகிலா கூறினாரர்.

தேச நிந்தனைச் சட்டம் செக்சன் 4(1)(c) இன் கீழ் அருட்செல்வம் விசாரிக்கப்படுகிறார் என்று கோகிலா மேலும் கூறினார்.

இந்த விதியின் கீழ் தேச நிந்தனையானவற்றை எழுதுவது, வெளியிடுவது, விற்பது, விற்பனைக்கு வைப்பது, விநியோகம் செய்வது அல்லது மறுபதிப்பு செய்வது குற்றமாகும். அதற்காக ரிம5,000 வரையில் அபராதம் அல்லது 3 ஆண்டு சிறை தண்டனை அல்லது இரண்டுமே விதிக்கப்படலாம்.

“இக்கைது அன்வார் சிறையிலடைக்கப்பட்ட தினத்தில் அருட்செல்வம் வெளியிட்ட ஓர் அறிக்கை சம்பந்தப்பட்டதாகும்”,  என்று அவர் கூறினார்.

இன்றிரவு விழிப்பு நிலை அனுசரிக்கப்படும்

கடந்த பெப்ரவரி 10 இல், குதப்புணர்ச்சி குற்றத்திற்காக அன்வாருக்கு விதிக்கப்பட்ட 5 ஆண்டு சிறை தண்டனை “எவ்வித சந்தேகத்திற்கும் இடமின்றி ஓர் அரசியல் தீர்ப்பாகும்” என்று அருட்செலவம் ஓர் அறிக்கை வெளியிட்டிருந்தார்.

அருட்செல்வதற்கு ஆதரவு தெரிவிக்க இன்றிரவு ஆதரவாளர்கள் டாங்வாங்கி மாவட்ட போலீஸ் தலைமையகத்திற்கு வெளியில் ஒரு விழிப்பு நிலை கூட்டத்தை நடத்துவார்கள் என்று கோகிலா தெரிவித்தார்.

குதப்புணர்ச்சி வழக்கு 2 சம்பந்தமாக தெரிவிக்கப்பட்ட கருத்துக்காக செய்யப்பட்ட இரண்டாவது கைது இதுவாகும்.

பெப்ரவரி 11 இல், அரசியல் கேலிச்சித்திரக்காரர் ஸூனார் அந்த தீர்ப்புக்குப் பின்னர் நீதிபதிகளை “மேலங்கியில் கையாள்கள்” என்று செய்திருந்தத டிவிட்டுக்காக தேச நிந்தனை சட்டத்தின் கீழ் கைது செய்யப்பட்டார்.

மூன்று நாள்களுக்கு அவர் தடுத்து வைக்கப்பட்டிருந்தார்.

பிகேஆர் தலைமைச் செயலாளர் ரபிஸி ரமலி மற்றும் பேராக் டிஎபி தலைவர் இங்கா கோர் மிங் ஆகியோர் வெளியிட்ட டிவிட்டுகளுக்காக அவர்களை விசாரிப்பதற்கு ஐஜிபி காலிட் அபு பாக்கார் உத்தர விட்டுள்ளார்.