பிரதமர்  நஜிப்  அப்துல்  ரசாக்மீது  முன்னாள்  பிரதமர்  டாக்டர்  மகாதிர்  முகம்மட்  தொடுத்துள்ள   தாக்குதல்  பற்றி  அம்னோ  இளைஞர்  தலைவர்  கைரி  ஜமாலுடினிடம்  கருத்துக்  கேட்கப்பட்டதற்கு  அவர்  இரு  தரப்புக்கும்  நல்ல  பிள்ளைபோல்  நடந்து  கொண்டார்.

மக்களிடம்  மகாதிருக்கு  அளவற்ற  செல்வாக்கு  இருப்பதால்  அவர் வலைப்பதிவில்  எழுதியதைப் புறந்தள்ளிவிட  முடியாது  என்று  கைரி  கூறினார்.

அதனால், அவர்  எழுப்பியுள்ள  கேள்விகளுக்கு  அவை  ஏற்கனவே  பதில்  அளிக்கப்பட்ட  கேள்விகளாக  இருந்தாலும்  நஜிப் பதில் சொல்லத்தான்  வேண்டும்.

“மகாதிர்  எழுதியவற்றுக்குப்  பதில் கூறத்தான்  வேண்டும். நெருப்புக்  கோழிபோல் தலையை  மண்ணுக்குள்  புதைத்துக்  கொண்டு  பிரச்னை  போய்விடும்  என்று  நினைத்துக்  கொண்டிருக்கக்  கூடாது. அது  சரியல்ல”, என்றாரவர்.

அதே  வேளை  அம்னோ  இளைஞர்  பிரிவு  அமைச்சரவை  ஆகியவற்றின் ஆதரவு  நஜிப்புக்கே  என்பதையும்  கைரி  வலியுறுத்தினார்.

“பிரதமர்  என்ற  முறையிலும்  அம்னோ  தலைவர்  என்ற  முறையிலும்  நஜிப்பின்  தலைமைத்துவத்தின்மீது  நாங்கள்  நம்பிக்கை  கொண்டிருக்கிறோம்”, என்றாரவர்.