தேர்தல்  சீரமைப்புக்காக  போராடும்  பெர்சே  தேர்தல்  ஆணையத்தின்(இசி)  வாக்காளர்  பதிவில்   முறைகேடுகள்  நிகழ்ந்திருப்பதாகக்  குற்றஞ்சாட்டியுள்ளது.  இசி  வாக்காளர்  பதிவுக்கு  சிறப்பு விவகாரத்  துறை(ஜாசா)  அதிகாரிகளைப்   பயன்படுத்துவதை  அது  சுட்டிக்காட்டுகிறது.

2013  பொதுத்  தேர்தலுக்குப்  பின்னர்  என்ஜிஓ-களையும்  அரசியல் கட்சிகளையும்  சேர்ந்தவர்கள்  உதவிப்  பதிவதிகாரிகளாக(ஏஆர்ஓ)ச்  செயல்படுவதை  இசி  நிறுத்திக்  கொண்டது.

ஆனால், ஜாசா  அதிகாரிகள்  இன்னமும்  உதவி  பதிவதிகாரிகளாகச் செயல்பட அனுமதிக்கப்படுகிறார்கள்.

ஜோகூர்  ஜாசா  இணையத் தளத்தைச்  சோதித்துப்  பார்த்ததில்  அதில்  உள்ள  52 ஏஆஓ-களில்  35 பேர் பிஎன்னுடன்  அல்லது  பிஎன்னுடன்  தொடர்புள்ள  என்ஜிஓ-களைச்  சேர்ந்தவர்கள்  என்பது  தெரிய  வந்ததாக  பெர்சே  இன்று  செய்தியாளர்  கூட்டமொன்றில்  கூறியது.

“மலாக்கா  இசி  இணையத் தளத்தில்  பட்டியலிடப்பட்டுள்ள  ஏஆர்ஓ-கள்  அம்னோவையும்  பிஎன் -ஆதரவுக்  கட்சியான  இந்தியர்  முற்போக்குக்  கட்சி(ஐபிஎப்)யையும்  சேர்ந்தவர்கள்”, என பெர்சே  செயலக  அதிகாரி  ஸோ  ரந்தாவா  கூறினார்.

ஜாசா ஊழியர்களையும்  ஆளும்  கட்சி  உறுப்பினர்களையும்  ஏஆர்ஓ-களாகச்  செயல்பட  அனுமதித்து  என்ஜிஓ-களும்  எதிரணி உறுப்பினர்களும்   ஏஆர்ஓ-களாகச்  செயல்பட  அனுமதி  மறுப்பது  இசி-யின்  நம்பகத்தன்மைமீதும் நேர்மையின்மீதும்  சந்தேகம்  கொள்ள  வைக்கிறது  என ரந்தவா  கூறினார்.

ஜாசா  என்பது  தொடர்பு, பல்லூடக  அமைச்சின்  பிரச்சாரப்  பிரிவாகும்.