ஊழியர்  சேமநிதி (இபிஎப்)  சந்தாதாரர்கள்  அவர்களின் பணத்தை 55 வயது  தொடங்கிக்  கட்டம்  கட்டமாக  மீட்டுக்கொள்ள  அனுமதிக்கலாம்  என  பிகேஆர்  உதவித்  தலைவர்  ரபிஸி  ரம்லி  ஒரு  சமரசத்  திட்டத்தை  முன்வைத்துள்ளார்.

பணமீட்பு  வயதை  55-இலிருந்து  60-க்கு  உயர்த்த  இபிஎப் எண்ணியிருப்பதாக  வெளிவந்த  செய்திக்கு  எதிராக  சந்தாதாரர்கள்  போர்க்கொடி  தூக்கியதை  அடுத்து  அவர்  இப்படி  ஒரு  சமரசத் திட்டத்தை  முன்வைத்தார்.

55 வயதில்  பணத்தை  மீட்டுக்கொள்ள  இடமளித்தால்  சில  ஆண்டுகளிலேயே  சேமித்த  பணத்தை  முடித்து  விடுவார்கள்  என்ற  இபிஎப்-பின் விளக்கத்தை  ஏற்றுக்கொள்வதாக  ரபிஸி  கூறினார்.

“அதைக்  கருத்தில்கொண்டு  இபிஎப்  சந்தாதாரர்கள்  55  தொடங்கி  60-வயதுவரை  கட்டம் கட்டமாக  பணத்தை  மீட்பதற்கு  அனுமதிக்கலாம்  எனப்  பரிந்துரைக்கிறேன்.

“உதாரணத்துக்கு, சந்தாதாரர்கள்  55-வயதில் 60 விழுக்காட்டுப்  பணத்தையும் மீதமுள்ள  40  விழுக்காட்டை  60-வயதிலும்  மீட்டுக்கொள்வதென  முடிவு  செய்யலாம்”, என  ரபிஸி  இன்று  ஓர்  அறிக்கையில்  கூறினார்.

அல்லது 50:50 அல்லது 40:60  என்றுகூட  பணத்தை  மீட்டுக்கொள்ளலாம். அதை  அவர்களின்  விருப்புரிமைக்கு  விட்டுவிடலாம்  என்றாரவர்.