தாமான்  மேடானில்  சிலுவை- எதிர்ப்பு  ஆர்ப்பாட்டம்  நடத்தியதற்காக  அப்துல்லா  அபு  பக்கார், பெட்டாலிங்  ஜெயா போலீஸ்  மாவட்டத்  தலைமையகத்துக்கு  விசாரணைக்காக  அழைக்கப்பட்டிருக்கிறார்.

ஆனால், போலீஸ் படைத்  தலைவர்  காலிட்  அபு  பக்காரின்  உடன்பிறப்பான  அவர்  அதைப்  பற்றிக் கவலைப்படவில்லை.

தாமான்  லிண்டோங்கான்  ஜெயா  அம்னோ  கிளைத்  தலைவரான  அப்துல்லா, இன்று  மாலை  போலீஸ்  தலைமையகம்  செல்லப்போவதாக  தெரிவித்தார். அவர் வழக்குரைஞரை உடன்  அழைத்துச்  செல்ல  மாட்டார்.

“வழக்குரைஞர்  எதற்கு, இது  ஒரு  சின்ன  விவகாரம்”, என்றவர்  மலேசியாகினியிடம்  தெரிவித்தார்.

“போலீசார்  இன்று  காலை என்னை  அழைத்து போலீஸ்  நிலையம்  வருமாறு  கூறினர். வேறு  யாரையெல்லாம்  கூப்பிட்டிருக்கிறார்கள்  என்பது  தெரியாது”, என்றவர்  சொன்னார்.