நேற்றிரவு  கொழும்பு  நோக்கிப் பறந்து  கொண்டிருந்த  மலேசிய  விமான  நிறுவனத்தின்  எம்எச்179 விமானம், “குடிபோதையிலிருந்த” பயணி  ஒருவர்  செய்த  ரகளையால்  கோலாலும்பூர்   அனைத்துலக  விமான  நிலையத்துக்கே  திரும்பி  வந்தது.

“விமானம்  புறப்பட்ட  சிறிது  நேரத்தில்  மதுமயக்கத்திலிருந்த  அப்  பயணி  மலேசிய விமானப்  பணியாளர்களுக்குத் தொல்லை  கொடுக்கத்  தொடங்கினார்.

“உடல் பருத்தவர் என்பதால்  அவரைக்  கட்டுப்படுத்த  மற்ற  பயணிகளும்   விமானப்  பணியாளர்களுக்கு  உதவினார்கள்”, என  எம்ஏஎஸ்  ஓர்  அறிக்கையில்  கூறியது.

அதன்  பின்னர் விமானத்தின்  பாதுகாப்பையும்  பயணிகளின்  செளகரியத்தையும்  கருதி  விமானி விமான  நிலையத்துக்கே  திரும்பி  வர  முடிவு  செய்தார்.

கேஎல்ஐஏ  வந்ததும்  குழப்பம்  விளைவித்த  பயணி  அதிகாரிகளிடம்  ஒப்படைக்கப்பட்டார்.

அவ்விமானம்  மறுபடியும் இன்று  காலை மணி  10.06க்கு கொழும்பு  பயணத்தைத்  தொடர்ந்ததாக  எம்ஏஎஸ்  கூறியது.