அண்மைய  வால் ஸ்திரிட்  ஜர்னல் (WSJ)  செய்திகள்  தனது  இடைக்கால கணக்காய்வு  அறிக்கையை  அடிப்படையாகக்  கொண்டவை  அல்ல  என்று  தேசிய  கணக்காய்வுத்  துறை கூறியுள்ளது.

“WSJ செய்திக்கும் 1எம்டிபி  இடைக்கால கணக்காய்வு  அறிக்கைக்கும்  தொடர்பில்லை. தேசிய  கணக்காய்வுத்  துறையிலிருந்து  WSJ-க்கு  எந்தவொரு  செய்தியும்  சென்றதில்லை”, என  அத்துறையின்  ஆய்வுப்  பிரிவு  துணை  இயக்குனர்  மசியா  அஹ்மட்  மலேசியாகினிக்கு  மின்னஞ்சலில்  அனுப்பிய  பதிலில்  கூறினார்.

1எம்டிபி-இன்  யுஎஸ்$700 மில்லியன்  நஜிப்பின்  சொந்த  வங்கிக்  கணக்குக்கு  மாற்றிவிடப்பட்டிருப்பது  மலேசிய  விசாரணையாளர்களின்  ஆவணங்களிலிருந்து  தெரிய  வந்திருப்பதாக  WSJ  கடந்த  வாரம்  செய்தி  வெளியிட்டிருந்தது.

நஜிப்  அதை  மறுத்தார். WSJ அந்தச்  செய்தி  உண்மையானது  என்கிறது.

1எம்டிபி-இல் முறைகேடுகள்  நிகழ்ந்திருப்பதாக  பரவலாகக்  கூறப்பட்டதைத்  தொடர்ந்து  அந்நிறுவனத்தின்  கணக்குவழக்குகளை  ஆராயுமாறு  கணக்காய்வுத்  துறையை  நஜிப்  பணித்தார்.

கணக்காய்வுத்  துறையின்  இடைக்கால  அறிக்கை  வியாழக்கிழமை  பொது  கணக்குக் குழுவிடம்  கொடுக்கப்படும்  எனத்  தெரிகிறது. ஆனால்,  அது பொதுமக்களின்  பார்வைக்கு  வருவது  சந்தேகமே.