சரவாக்  ரிப்போர்ட்  இணையத்தளத்தை  முடக்கிவைத்துள்ளதுபோல்  மகாதிரின்  அகப்பக்கமான  chedet.cc-ஐ  முடக்கி  வைக்கும்  துணிச்சல்  பிரதமர்  நஜிப் அபதுல்  ரசாக்குக்கு  உண்டா  என  எதிரணி  எம்பி  ஒருவர்  சவால்  விடுத்துள்ளார்.

மலேசிய  தொடர்பு  மற்றும்  பல்லூடக  ஆணையம் (எம்சிஎம்சி),   1எம்டிபி  பற்றி  சரவாக்  ரிப்போர்ட்  தொடர்ந்து  தகவல்கள்  வெளியிட்டு  வருவது  அரசியல்  நிலைத்தன்மையைக்  குலைத்துவிடும்  என்று  கூறி  அந்த  இணையத்தளத்தை  முடக்கிப்போட்டுள்ளது.

உண்மையில், சரவாக்  ரிப்போர்ட்டின்  தகவல்கள்  1எம்டிபிமீதுள்ள  நம்பிக்கையைக்  குறைத்துவிடும்  என்ற  அச்சம்தான்  அந்த  இணையத்தளத்தின்  முடக்கத்துக்குக்  காரணம்  என்கிறார் பிகேஆர்  உதவித்  தலைவர்  ரபிஸி  ரம்லி.

“1எம்டிபி  பற்றித்  தொடர்ந்து  தகவல்களை  வெளியிட்டுவரும்  செல்வாக்குமிக்க  இன்னொரு  இணையத்தளம்  chedet.cc என்பது  அம்னோவுக்குத்  தெரிந்த  விசயம்தான். அதற்கும் ஒவ்வொரு  நாளும்  நிறைய  வருகையாளர்கள்  வருகிறார்கள்.

“அம்னோ, 1எம்டிபி  பற்றிய  செய்திகளை  முற்றிலும்  இருட்டடிப்புச்  செய்வது   என்பதில் தீவிரமாக  இருந்தால் ,  இரட்டை  நியாயம்  கூடாது, chedet.cc தளத்தையும்  முடக்க வேண்டும்”, என  ரபிஸி  கூறினார்.

அப்போதுதான்  பொய்யான  செய்திகளைச்  சகித்துக்  கொண்டிருக்க  முடியாது  என்ற  புத்ரா  ஜெயாவின்  வாதத்தை  ஏற்க  முடியும். பார்க்கப்போனால்,  சரவாக்  ரிப்போர்ட்டை  விடவும்  மோசமான  முறையில்  chedet.cc நஜிப்பைச்  சாடி  வருகிறது என  ரபிஸி  மலேசியாகினியிடம்  குறிப்பிட்டார்.