எதிர்வரும் ஆகஸ்ட் 29-30 இல் நடைபெற திட்டமிடப்பட்டிருக்கும் பெர்சே 4 பேரணியில் மக்களுக்கு பாதுகாப்பு சேவைகளை வழங்க 2,000 தொண்டர்கள் சேர்க்கப்பட்டுள்ளனர். பாஸ் கட்சியின் தன்னார்வலர் பாதுகாப்பு பிரிவினர் அமல் இதில் பங்கேற்கவில்லை.

கடந்த வாரம் பெர்சே தொடங்கிய நிதி திரட்டல் பரப்புரையின் வழி ரிம120,000 திரட்டப்பட்டுள்ளது.

2,000 பேர் பாதுகாப்பு வழங்க திரட்டப்பட்டுள்ளதை பெர்சேயின் தலைவர் மரியா சின் அப்துல்லா உறுதிப்படுத்தினார். இதற்கு இதர அரசியல் கட்சிகளும் உதவின என்றாரவர்.

இதற்கு முன்னர் நடைபெற்ற பேரணிகளில் கூட்டத்தினரை கட்டுப்படுத்துவதற்கு பாஸ் கட்சியின் அமல் என்ற தன்னார்வலர் பாதுகாப்பு பிரிவை பெர்சே பெரிதும் நம்பியிருந்தது என்று மரியா மேலும் கூறினார்.

முன்பிருந்ததைப் போலல்லாமல் இம்முறை பாஸ் நேரடியாக இப்பேரணியில் பங்கேற்காது. இன்று இதனை உறுதிப்படுத்திய பாஸ் தலைவர் அப்துல் ஹாடி அவாங், கட்சி இரு பிரதிநிதிகளை அனுப்பும் என்றார்.

இப்பேரணியை ஏற்பாடு செய்வதில் பாஸ் கட்சி பங்கேற்கவில்லை என்றாலும், அக்கட்சியின் உறுப்பினர்கள் இப்பேரணியில் பங்கேற்பதைத் தடுக்கவில்லை என்பதோடு அவர்கள் அதில் பங்கேற்பதற்கு ஆதரவும் அளிக்கவில்லை என்று அவர் மேலும் கூறினார்.

இதனிடயே, சட்டவிரோதமான முறையில் பெர்சே 4 பேரணி அரசாங்கத்தைக் கவிழ்க்க முயன்றால் போலீஸ் நடவடிக்கை எடுக்கும் என்று போலீஸ் எச்சரிக்கை விடுத்துள்ளது..

இப்பேரணியின் முழு பாதுகாப்பிற்கும் பெர்சேதான் பொறுப்பேற்க வேண்டும் என்று போலீஸ் தெரிவித்துள்ளதாக கூறிய மரியா, பெர்சே ஒரு சிவியன் அமைப்பு. அது கூட்டத்தினரை கட்டுப்படுத்துவது போன்ற சில சாதாரண நடவடிக்கைகளை பெர்சே கவனித்துக் கொள்ளும். ஆனால், கடுமையான பிரச்சனைகள் என்றால், அது போலீசாரின் பொறுப்பாக இருக்க வேண்டும் என்றார்.