முகைதின்  யாசின்  துணைப்  பிரதமர்  பதவியிலிருந்து  அகற்றப்பட்டது  ஒரு  விவேகமற்ற  நடவடிக்கை  என்றும்  அதை அம்னோ  அடிநிலை  உறுப்பினர்களால்  ஏற்றுக்கொள்ள  முடியவில்லை  என்றும்  அம்னோ  கிளைத்  தலைவர்  ஒருவர்  சொன்னார்.

முகைதினை  நீக்கும்  முடிவானது  கட்சியைப்  பிளவுபடுத்தும்  ஒன்றாகத்தான்  கருதப்படுகிறது  என  புசாட்  பண்டார்  தாமான்  செம்பாகா  அம்னோ  கிளைத்  தலைவர்  சைட்  சைபுடின்  சைட்  ஹர்மான்  கூறினார்.

ஆனாலும்  பிரதமர்  நஜிப்  அப்துல்  ரசாக்குக்கு  அதற்கான  அதிகாரம்  உண்டு  என்பதையும்  அவர்  ஒப்புக்கொண்டார்.

“அடிநிலையில்  உள்ள  எங்களால்  அதை  ஏற்க  முடியவில்லைதான். ஆனால், அது  பிரதமரின்  அதிகாரத்துக்கு  உட்பட்டது. அதனால்  கேள்வி  கேட்க  முடியாது.

“என்றாலும்  அதனால்  கட்சி  உடைபடலாம்  என்பதால் அதை  ஒரு  விவேகமற்ற  செயல்  என்றே  கருதுகிறோம். கட்சி  உறுப்பினர்  என்ற  முறையிலும்  கிளைத்  தலைவர்  என்ற  முறையிலும்  அதை  ஒரு  விவேகமான  செயலாக  நான்  நினைக்கவில்லை”, என்றாரவர்.