முகம்மட்  அலி  பஹாரோம்  தாமான்  மலாக்கா  ராயாவில்  நடத்தத்  திட்டமிட்டிருந்த  கண்டனப்  பேரணியை  அதிகாரிகள்  கேட்டுக்கொண்டதற்கிணங்கக்  கைவிட்டார்.

அலி  திஞ்சு  என்ற  பெயரில்  பிரபலமாக  விளங்கும்  முன்னாள்  மலாய்  படைவீரர்  சங்கத்தின் தலைவரான அவர்,  அதே  நாளில்  வரும்  மலாக்கா  ஆளுனரின்  பிறந்த  நாளுக்கு  மரியாதை  கொடுத்து  ஆர்ப்பாட்டத்தைக்  கைவிடுவதாகக்  கூறினார்.

செப்டம்பர்  30-இல், குடிநுழைவுத்  துறை  அதிகாரிகள்  மூவர்  ‘சீனக் குண்டர்களால்’  தாக்கப்பட்டதாகக் கூறி  அதற்குக்  கண்டனம்  தெரிவிக்கவே  அப்  பேரணி  ஏற்பாடு  செய்யப்பட்டதாக  அவர்  கூறினார்.

“போலீசும்  அரசாங்கமும்  அக்டோபர்  10-இல்  பேரணி  வேண்டாம்  என்று  அறிவுறுத்தியுள்ளனர்.

“எனவே ஆளுனரின்  பிறந்த  நாளுக்கு  மரியாதை  தெரிவித்து  அக்டோபர்  10-இல்  பேரணிக்கு வர  வேண்டாம்  என  கெராக்கான்  மெரா  தலைவர்  என்ற  முறையில்  என்  ஆதரவாளர்களைக்  கேட்டுக்கொள்கிறேன்”, என்றாரவர்.