முன்னாள் மசீச தலைவர் லிங் லியோங் சிக் மன்னிப்பு கேட்பதற்கில்லை என்று கூறி விட்டதால் அவருக்கு எதிராக அடுத்த கட்ட நடவடிக்கை மேற்கொள்ள பிரதமர் நஜிப் அப்துல் ரசாக்கின் உத்தரவுக்காகக் காத்திருப்பதாக வழக்குரைஞர் முகம்மட் ஹபாரிஸாம் ஹருன் கூறினார்.
மன்னிப்பு கேட்பதற்கு லிங்குக்குக் கொடுக்கப்பட்ட 7-நாள் கெடு இன்றுடன் முடிவுக்கு வருவதையொட்டி ஹவாரிஸாம் இவ்வாறு கூறினார்.
நஜிப் பதவி விலக வேண்டும் என்று கோரிக்கை விடுத்ததற்காக லிங் மன்னிப்பு கேட்க வேண்டும் என நஜிப் அவருக்குத் தம் வழக்குரைஞர் மூலமாகக் கடிதம் அனுப்பியிருந்தார்.
வெள்ளிக்கிழமை வரை அக்கடிதத்துக்கு லிங்கின் வழக்குரைஞர்களிடமிருந்து பதில் வரவில்லை எனக் கூறப்பட்டிருந்தது.
ஆனால், லிங்கின் வழக்குரைஞர் ரஞ்சிட் சிங், முன்னாள் மசீச தலைவரின் பதிலை வியாழக்கிழமையே ஹவாரிஸாம் அலுவலகத்துக்குத் தொலைநகல் வழி அனுப்பி வைத்து விட்டதாக தெரிவித்தார்.
